छत्रपती संभाजीनगर (सीएससीएन वृत्तसेवा) : कुटूंब मामाकडे दावतला गेल्याची संधी साधून चोरट्यांनी घर साफ केले. ४० हजारांचे दागिने चोरून नेले असून, जिन्सी पोलिसांनी चोरट्यांविरुद्ध गुरुवारी (३१ जुलै) गुन्हा दाखल केला आहे. ही घटना बायजीपुऱ्यातील गल्ली नं. १४ मध्ये घडली.
जुनेद मुकीम शेख (वय २१, रा. गल्ली नं. १४, हनुमान मंदिराजवळ बायजीपुरा) यांनी या प्रकरणात तक्रार दिली आहे. तो कुटुंबासह राहतो व सावरकर चौक येथील आनंद दूध डेअरीवर मजुरी करतो. रविवारी (२७ जुलै) संध्याकाळी सातला त्याचे मामा अब्दुल गफार (रा. हर्सूल) हे हजला जाणार असल्याने व त्यांच्या घरी दावत असल्याने जुनेद हा कुटुंबासह घराला कडी लावून मामाकडे गेला होता. तेथील दावत संपवून रात्री साडेनऊला सुमारास घरी परतला असता घराचा दरवाजा उघडा दिसला. घरात पाहिले असता कपाटातील जुनी वापरती सोन्याची पट्टीपोत ७ ग्रॅम वजनाची (किंमत अंदाजे २८ हजार रुपये), जुनी वापरती सोन्याची अंगठी ३ ग्रॅमची (किंमत अंदाजे १२ हजार ५०० रुपयांची) असा एकूण ४० हजार ५०० रुपयांचा मुद्देमाल चोरांनी चोरून नेल्याचे समोर आले. अधिक तपास सहायक पोलीस उपनिरीक्षक उपेंद्र कुतूर करत आहेत.
