छत्रपती संभाजीनगर (सीएससीएन वृत्तसेवा) : सिडको एन ५ मधील गुलमोहर कॉलनीतील स्काय ब्लू कॅफेवर ३ टवाळखोरांनी हल्ला केला. कॅफेचालक दोन्ही भावांवर लोखंडी रॉड, चाकूने वार केले. यात दोन्ही भावांना त्‍यांच्या मदतीला धावलेला तरुणही गंभीर जखमी झाला आहे. ही घटना गुरुवारी (३१ जुलै) दुपारी साडेतीनच्या सुमारास घडली.
प्रतिक राजू राऊत (वय १९, रा. भवानीनगर जालना, ह. मु. आविष्कार कॉलनी सिडको एन ६ छत्रपती संभाजीनगर) याने या प्रकरणात तक्रार दिली आहे. प्रतिक आणि त्याचा मोठा भाऊ रोहित यांनी मिळून गुलमोर कॉलनी सिडको एन ५ येथे स्काय ब्लू नावाचा कॅफे सुरू केला आहे. इव्हेंट मॅनेजमेंटचे कामही ते करतात. इव्हेंट मॅनेजमेंटचे कार्यालय तळमजल्यावर आहे. वरच्या मजल्यावर स्काय ब्लू नावाचा कॅफे आहे.
गुरुवारी काय झालं? गुरुवारी (३१ जुलै) दुपारी साडेतीनच्या सुमारास प्रतिक व रोहित कॅफेमध्ये असताना अचानक तीन अनोळखी तरुण आले. ते म्हणाले, की तुम्ही येथे कॅफे कसे चालवता? आम्हाला पैसे द्या. त्यावर दोन्ही भावांनी त्‍यांना तुम्हाला कशाचे पैसे द्यायचे, अशी विचारणा केली. त्यावर तिघापैकी एकाने रोहितची कॉलर धरली व अन्य दोघांनी प्रतिक व रोहित यांना मारहाण करायला सुरुवात केली. त्यांच्याकडील चाकूने प्रतिकच्या गालावर वार केले. दोन्ही भाऊ कॅफेच्या बाहेर पळाले असता ते त्‍यांचा सिनेस्‍टाइल पाठलाग करू लागले. रोहितच्या डोक्यात रॉडने मारून त्‍यांनी जखमी केले. प्रतिकचा मित्र लहू सुभाष तांबे हा मदतीला आला असता त्‍यालाही डोक्यात रॉडने मारून जखमी करण्यात आले. त्‍यानंतर तिघे पळून गेले. दुकानदारांनी तिघांनाही मेडीकव्हर हॉस्पिटलमध्ये दाखल केले. तिथून तिघांना घाटी रुग्णालयात हलविण्यात आले. प्रतिकच्या तक्रारीवरून सिडको पोलिसांनी अनोळखी हल्लेखोरांविरुद्ध गुन्हा दाखल केला आहे. अधिक तपास पोलीस अंमलदार भाऊसाहेब जगताप करत आहेत.
