छत्रपती संभाजीनगर (सीएससीएन वृत्तसेवा) : शिवाजीनगर येथील भुयारी मार्गावर पत्र्याचे छत उभारण्यासाठी जागतिक बँक प्रकल्प विभागाने २६ जुलै ते ३१ जुलै असा कालावधी जाहीर केला. मात्र हा काळ केवळ सांगाडा उभारण्यात गेला. दुसरीकडे भुयारी मार्ग बंद असल्याने वाहतुकीची कोंडी होत असल्याने पोलिसांनी आज, १ जुलैपासून भुयारी मार्गातून वाहतूक सुरू करण्याचा निर्णय घेतला असून, पत्रे बसविण्याचे काम आता रात्री केले जाणार आहे.
शिवाजीनगर भुयारी मार्गात पावसाचे पाणी साचत असल्याने पत्रे टाकले जात आहेत. या उपाययोजनेबाबत जागतिक बँक प्रकल्पाच्या सूत्रांनी सांगितले, की छत उभारण्याचे नियोजन आधीपासून होते. मात्र, कामे बाकी असतानाच भुयारी मार्गाचे उद्घाटन फेब्रुवारीत उरकण्यात आले. ३१ जुलैपर्यंत छत बसविणार असल्याचे जागतिक बँक प्रकल्प विभागाने सांगितले होते. मात्र या मुदतीत केवळ सांगाडा उभारला आहे. त्यांनी पुढील कामाबाबत वाहतूक पोलिसांना कळवलेही नाही. त्यामुळे आता भुयारी मार्गातून वाहतूक सुरू केली जाणार असून, आता पत्रे टाकण्याचे काम मध्यरात्री १२ नंतर करायला सांगितल्याचे वाहतूक विभागाचे पोलीस निरीक्षक अमोल देवकर यांनी पत्रकारांना सांगितले.
