छत्रपती संभाजीनगर (सीएससीएन वृत्तसेवा) : सिटी चौक पोलीस ठाण्याच्या हद्दीतील शताब्दीनगरात बुधवारी (३१ जुलै) रात्री १० च्या राडा झाला. कुत्रे भुंकत असल्याचे सांगितल्यावरून दोन भावांवर तिघा बापलेकांनी तलवार, चाकूचे वार केले. मोठा जमाव जमला. सिटी चौक पोलिसांनी वेळीच घटनास्थळी धाव घेऊन जखमींना घाटी रुग्णालयात दाखल केले. गुरुवारी (३१ जुलै) तिघांविरुद्ध गुन्हा दाखल केला आहे.
रोहित राजेंद्र तुपे (वय ३६, रा. एन १२ शताब्दीनगर चर्चच्या बाजूला) यांनी या प्रकरणात तक्रार दिली आहे. ते रिक्षाचालक आहेत. बुधवारी रात्री १० च्या त्यांनी ऑटोरिक्षा चर्चजवळ पार्क केली. पायी घरी जात असताना संजय शिरसाठ यांनी पाळलेले कुत्रे जोरात भुंकत असल्याने तुपे यांनी संजय शिरसाठ याला कुत्रे नीट ठेवायला सांगितले. त्यावर त्याने "तू काय कुठला दादा आहेस का’, असे बोलून तुपे यांची गचांडी पकडली व मारहाण केली. त्याचा मुलगा आनंद शिरसाठ व चेतन शिरसाठ हेही धावून आले. त्यांनीही तुपे यांना मारहाण केली.
आरडाओरड ऐकून तुपे यांचा लहान भाऊ अक्षय धावून आला. अक्षयने त्यांना जाब विचारला असता संजय शिरसाठ व त्याची दोन्ही मुले हत्यारे घेऊन आले. आनंद शिरसाठ याच्या हातात मोठी लोखंडी तलवार होती. त्याने तलवारीने रोहित तुपे यांच्या डोक्यात वार केला. नंतर संजय शिरसाठ याने रोहित तुपे यांच्या पोटात चाकू खुपसण्याचा प्रयत्न केला. त्यांनी अक्षय तुपे यांनाही हत्यारांनी मारहाण करून जखमी केले. त्यामुळे मोठी गर्दी जमून तणाव निर्माण झाला. सिटी चौक पोलिसांना कळताच पोलीस निरीक्षक दिलीप चंदन यांनी घटनास्थळी धाव घेतली. रोहित व अक्षय यांना घाटी रुग्णालयात दाखल केले.
