छत्रपती संभाजीनगर (सीएससीएन वृत्तसेवा) : मोटारसायकलीचे हप्ते थकले, असे म्हणत फायनान्स कंपनीच्या गुंडांनी तरुणाला गरवारे स्टेडियमजवळ सिनेस्टाइल लुटले. धमक्या देत त्यांनी तरुणाच्या खिशातून ४ हजार रुपये घेतले व दुचाकीही नेली. तरुणाच्या तक्रारीवरून सिडको एमआयडीसी पोलिसांनी अनोळखी चौघांविरुद्ध गुन्हा दाखल केला आहे.
प्रकाश ज्ञानेश्वर पारवे (वय २२, रा. अन्वी, ता. सिल्लोड) याने या प्रकरणात तक्रार दिली आहे. त्याचे वडील शेती करतात. गुरुवारी (३१ जुलै) सकाळी साडेदहाला तो मोटारसायकलीने (MH 20 GS 4390) करमाड येथे कंपनीत जॉब बघण्यासाठी जात होता. गरवारे स्टेडियमजवळ लहुजी साळवे चौक नारेगाव रोड येथे पांढरी स्कॉर्पिओ त्याच्याजवळ येऊन थांबली. गाडीत ४ अनोळखी व्यक्ती होते. त्यातील एक व्यक्ती म्हणाला, की तुझ्या मोटारसायकलीचे ९ हप्ते बाकी आहेत. तू बाकी असलेले पैसे आमच्याकडे दे. नाहीतर आम्ही तुझी गाडी ओढून घेऊन जाऊ, असे म्हणून त्यातील एकाने प्रकाशच्या खिशातील ४ हजार रुपये हिसकावले. त्याच्या मोटारसायकलची चावी त्याच्याकडून घेऊन मोटारसायकल घेऊन गेले. गुंड म्हणाला, की तू बाकीचे पैसे फोनपेच्या स्कॅनरवर पाठव. तेव्हा तुला गाडी परत देतो. असे म्हणून त्यांनी मोटारसायकल नेली. अधिक तपास पोलीस अंमलदार जहीर शेख करत आहेत.
