पैठण/कन्नड (सीएससीएन वृत्तसेवा) : बिडकीन परिसरातील फारोळा येथील अजित सीड्स कंपनीत वैभव युवराज पवार (वय २४, रा. निमगाव, ता. पैठण) या कामगाराने गळफास घेऊन आत्महत्या केल्याची घटना मंगळवारी (१५ ऑक्टोबर) सकाळी समोर आली. त्याच्या आत्महत्येचे कारण समोर आलेले नाही.
वैभव वर्षभरापासून अजित सीड्स कंपनीत काम करत होता. कंपनीमधील कामगारांसाठी असलेल्या रूममध्ये तो राहत होता. दसरा सणाच्या निमित्ताने त्याच्यासोबत राहणारे इतर कामगार गावी गेले होते. वैभव एकटाच खोलीत होता. तीन दिवसांपूर्वी त्याने आधी विष पिले. नंतर गळफास घेऊन जीवनयात्रा संपविली. मंगळवारी सकाळी खोलीतून दुर्गंधी येत असल्याने कंपनीतील काही कामगारांनी खोलीत जाऊन पाहिले असता वैभव गळफास घेतलेल्या अवस्थेत आढळला. बिडकीन पोलिसांनी घटनास्थळी धाव घेऊन पंचनामा केला. मृतदेह उत्तरीय तपासणीसाठी बिडकीन ग्रामीण रुग्णालयात आणला. बिडकीन पोलिसांनी आकस्मिक मृत्यूची नोंद केली आहे. वैभवच्या पश्चात आई, एक भाऊ असा परिवार आहे. त्याच्या आत्महत्येचे नेमके कारण समोर आलेले नाही.
घाटशेंद्र्यात तरुणाची आत्महत्या
कन्नड तालुक्यातील घाटशेंद्रा येथे अशोक साहेबराव बनकर (वय ३५) याने राहत्या घरात गळफास घेऊन आत्महत्या केली. तो आईसह राहत होता. रविवारी दुपारी तीनच्या सुमारास घरात झोपायला जातो असे सांगून तो घरात गेला. सायंकाळी साडेसात वाजले तरी अशोक घराबाहेर न आल्याने आईने जाऊन पाहिले असता त्याने गळफास घेतल्याचे दिसले. त्याच्या पश्चात आई, पत्नी, एक मुलगा, एक मुलगी असा परिवार आहे. आत्महत्येचे नेमके कारण समोर आलेले नाही.
.jpg)
.jpg)
.jpg)
