छत्रपती संभाजीनगर (मेट्रोपोलिस पोस्ट वृत्तसेवा) : महापालिकेच्या महिला व बालविकास विभागाने शहरातील १८ ते ३३ वयोगटातील मुली व महिलांना पोलीस भरतीसाठी प्रशिक्षण देण्याचा निर्णय घेतला असून, यासाठी अर्ज मागवले आहेत. लेखी व मैदानी चाचणी घेऊन महिला, मुलींची निवड करून त्यांना प्रशिक्षण दिले जाणार आहे. महापालिकेच्या अधिकृत संकेतस्थळावर, विभागाच्या कार्यालयात संपर्क साधून अर्ज करता येणार आहेत. त्यासाठी २२ डिसेंबरपर्यंत मुदत आहे.
सध्या पोलीस भरती पूर्व प्रशिक्षण केंद्रांकडून तरुण, तरुणींची अक्षरशः आर्थिक लूट होत असते. अनेक केंद्रांकडे तर स्वतःचे मैदानसुद्धा नाही. केंद्रांचे अव्वाच्या सव्वा शुल्क भरणे सर्वांनाच शक्य होत नाही. सध्या राज्यात १५ हजार ६३१ पदांसाठी पोलीस भरती होत असून, या भरतीमुळे खासगी प्रशिक्षण केंद्रचालकांकडून होणाऱ्या आर्थिक लुटीला आळा घालण्यासाठी आणि गरीब विद्यार्थिनी भरतीपासून वंचित राहू नये यासाठी महापालिकेने पुढाकार घेतला आहे. प्रशिक्षणादरम्यान शारीरिक चाचणी, लेखी परीक्षा, मुलाखत या सर्व स्तरांवर मार्गदर्शन केले जाईल. अर्जासोबत रहिवासी दाखला, शैक्षणिक प्रमाणपत्रे, आधार कार्ड आदी कागदपत्रे जमा करावी लागतील. निवड झालेल्या उमेदवारांना नाममात्र १० टक्के (२,५०० हजार रुपये) शुल्कासह नियोजित ठिकाणी प्रशिक्षण दिले जाणार आहे. राज्यात होणाऱ्या भरतीत सर्वाधिक मुलींची संख्या छत्रपती संभाजीनगर शहरातून असावी यासाठी प्रयत्न असल्याचे महापालिका आयुक्त जी. श्रीकांत यांनी सांगितले.
.jpg)
.jpg)
.jpg)
