गुंठेवारीतील बांधकामे अधिकृत करण्यासाठी आता ३१ डिसेंबरची मुदत!; महापालिकेचा निर्णय

छत्रपती संभाजीनगर (सीएससीएन वृत्तसेवा) : शहरातील गुंठेवारी वसाहतींमधील २०२० पर्यंतची बांधकामे अधिकृत करण्याचा निर्णय राज्‍य शासनाने घेतला असून, त्‍यावर महापालिकेकडून अंमलबजावणी सुरू आहे. महापालिकेने बांधकामे अधिकृत करून घेण्यासाठी ३० सप्‍टेंबरची मुदत दिली होती. ती आता वाढून ३१ डिसेंबर २०२४ केल्याची माहिती महापालिकेचे प्रशासक जी. श्रीकांत यांनी गुरुवारी (२६ सप्‍टेंबर) पत्रकार परिषदेत दिली.

११९ गुंठेवारी वसाहतींमधील मालमत्ता अधिकृत करून दिल्या जात आहेत. महापालिकेने विकास शुल्‍कात ५० टक्‍के सवलतही लागू केली आहे. गेल्या ५ महिन्यांत १५६० प्रस्‍ताव आले होते, त्‍यापैकी १३१० प्रस्‍ताव महापालिकेने मंजूर केले असून, यातून २२.७५ कोटी रुपयांचे उत्‍पन्‍न आले आहे. गुंठेवारीसाठी एक खिडकी योजना महापालिकेने सुरू केली आहे. त्‍यामुळे प्रस्ताव झटपट मंजूर केले जात आहेत. शहराच्या अनेक भागांत ग्रीन झोनवर वसाहती झाल्या आहेत. त्‍यामुळे विकास आराखड्यात या जमिनी यलो झोनमध्ये समाविष्ट केल्या आहेत. विकास आराखड्याला शासनाने अद्याप मंजुरी दिली नसली तरी त्‍या भागातील प्रस्‍ताव गुंठेवारी नियमितीकरणासाठी स्वीकारण्यात येतील, असे जी. श्रीकांत यांनी सांगितले.

टॅक्‍सवसुलीसाठी महापालिकेत वॉर रूम
महापालिकेने यंदा मालमत्ता करवसुलीचे उद्दिष्ट ५०० कोटींचे ठेवले असून, वसुली वाढविण्यासाठी टॅक्समित्र या नावाने नवीन वॉररूम महापालिकेत तयार केली आहे. पुढील १० दिवसांत या वॉररूममधून कामकाज सुरू करण्यात येणार असल्याची माहिती श्रीकांत यांनी दिली. महापालिका मुख्यालयाच्या बाजूला असलेल्या टप्पा क्रमांक तीनमधील दुसऱ्या मजल्यावर ही वॉररूम तयार केली आहे. वॉर्ड अधिकारी प्रसाद देशपांडे हे या उपक्रमाचे प्रमुख असून उपायुक्त अपर्णा थेटे यांच्या मार्गदर्शनाखाली कामकाज चालणार आहे.