छत्रपती संभाजीनगर (मेट्रोपोलिस पोस्ट वृत्तसेवा) : विट्स हॉटेल चौकातून देवगिरी कॉलेजकडे जाणाऱ्या रोडवर लुटारू सापळा लावून थांबलेले असतात. एकटेदुकटे कुणी जाताना दिसले, की लुटमार करतात. ३ डिसेंबरच्या घटनेनंतर बुधवारीही (१० डिसेंबर) २५ वर्षीय तरुणाला तिघांनी लुटले. त्याच्यावर तीक्ष्ण हत्याराने वार करून जखमी केले. हा रस्ता रात्रीच्या वेळी धोकादायक ठरत असून, वारंवार लुटमारीच्या घटना घडत असूनही पोलीस त्यावर अंकुश लावण्यात अपयशी ठरले आहेत.
अक्षय उमेश सोनवणे (वय २५, रा. शिवनगर, गादिया विहार रोड, छत्रपती संभाजीनगर) याने या प्रकरणात गुरुवारी (११ डिसेंबर) तक्रार दिली आहे. तो पेंटरचे काम करतो. बुधवारी (१० डिसेंबर) रात्री आठला विट्स हॉटेल चौकातून देवगिरी कॉलेज रोडने कामावरून घरी जात असताना तीन अनोळखी तरुणांनी स्पोर्ट्स बाईकवर येऊन अक्षयला अडवले. त्यांनी अक्षयला पैसे मागितले. अक्षयने त्यांना पैसे नसल्याचे सांगितल्यावर त्याने शिवीगाळ करण्यास सुरुवात केली. त्या तिघांपैकी काळ्या कलरचे शर्ट घातलेल्या तरुणाने अक्षयला हाताचापटाने मारहाण सुरू केली.
अक्षयने विरोध केल्याने त्यातील एकाने तीक्ष्ण हत्याराने अक्षयच्या हातावर वार केला. त्यामुळे अक्षय ओरडू लागला. ओरडला तर तुला अजून मारू, अशी धमकी दिली. त्यानंतर ते तिघे पळून गेले. अक्षयने उस्मानपुरा पोलीस ठाणे गाठले. लुटारूंच्या झटापटीत त्याच्या खिशातील रक्कम व गळ्यातील सोन्याचा ओम कोठेतरी पडला. उस्मानपुरा पोलिसांनी अक्षयला घाटी रुग्णालयात पाठवले. त्यानंतर घटना वेदांतनगर पोलीस ठाण्याच्या हद्दीत घडल्याने उपचार घेऊन अक्षय तक्रार देण्यासाठी वेदांतनगर पोलीस ठाण्यात आला. पोलिसांनी ३ लुटारूंविरुद्ध गुन्हा दाखल करून त्यांचा शोध सुरू केला आहे.
सलग दुसरी घटना३ डिसेंबरला पहाटेही विट्स हॉटेल चौकातून देवगिरी कॉलेजकडे एनसीसी सरावासाठी जाणाऱ्या १८ वर्षीय विद्यार्थ्याला ३ टवाळखोरांनी अडवून शिवीगाळ, दमदाटी करत कटरने वार केले होते. यात विद्यार्थी गंभीर जखमी झाला होता. त्यानंतर आता अक्षयसोबत ही घटना घडली. या रस्त्यावर सातत्याने टवाळखोर आणि लुटारूंचा वावर असून, रात्रीच्या वेळी ते एकट्यादुकट्या व्यक्तीला गाठून लुटमार, मारहाण करत असतात. या रस्त्यावर पोलिसांनी गस्त वाढवावी, अशी मागणी वारंवार होऊनही पोलीस गांभीर्याने घेत नसल्याने मोठा अनुचित प्रकारही घडू शकतो.
.jpg)
.jpg)
