सुरेवाडीत दोन गट भिडले !; लाठ्याकाठ्या-धारदार शस्‍त्रे चालली, तिघे गंभीर जखमी, १० जणांविरुद्ध गुन्हा दाखल

छत्रपती संभाजीनगर (मेट्रोपोलिस पोस्ट वृत्तसेवा) : हर्सूल भागातील सुरेवाडीत दोन गटांत तुंबळ हाणामारी झाली. यात ३ जण गंभीर जखमी तर इतर किरकोळ जखमी झाले. लाठ्याकाठ्या, धारदार शस्त्रांसह दोन्ही गट एकमेकांवर तुटून पडले होते. दोघांवर सह्याद्री, तर एकावर एम्स हॉस्पिटलमध्ये उपचार सुरू आहेत. ही घटना शनिवारी (६ डिसेंबर) रात्री पावणेदहाच्या सुमारास घडली. रविवारी पोलिसांनी दोन्ही गटांतील १० जणांविरुद्ध गुन्हा दाखल केला आहे.

सहायक फौजदार संजय हंबीर यांच्या तक्रारीनुसार, शनिवारी (६ डिसेंबर) रात्री पावणेदहाच्या सुमारास सुरेवाडी गल्ली नं. ४ च्या समोरील रोडवर ८ ते १० व्यक्तींमध्ये लाठ्या काठ्या व धारदार शस्त्रासह हाणामारी सुरू झाल्याची माहिती पोलिसांना मिळाली.  सहायक फौजदार संजय हंबीर आणि प्रकाश दिवटे यांनी सहकाऱ्यांसह लगेचच घटनास्‍थळी धाव घेतली. पोलिसांची गाडी पाहून भांडणारे पळून गेले. हाणामारीतील जखमी सुरेश राधाकिशन सुरे हा एम्स हॉस्पिटलमध्ये आणि कृष्णा एकनाथ ब्रह्म, रमेश गुंजाळ हे दोघे सह्याद्री हॉस्पिटलमध्ये दाखल असल्याचे पोलिसांना कळले. पोलिसांनी दोन्ही हॉस्पिटलमध्ये धाव घेऊन माहिती घेतली. सुरेश जबाब देण्याच्या स्थितीत नसल्याचे डॉक्टरांनी सांगितले, तर कृष्णाने पोलिसांना सुरेवाडीत सुरेश सुरे व त्याच्या साथीदारांसोबत हाणामारी झाल्याचे सांगितले.

मात्र त्याने पोलिसांत तक्रार देण्यास नकार दिला. त्यामुळे पोलिसांनीच स्वतःहून पुढे येत एका गटातील सुरेश राधाकिशन सुरे (वय ३०), किरण खेमचंद पचलोरे (वय २१), रुपेश भागिरथ सुरे (वय २३), शिवा आंबादास सुरे (वय २३), मनिष गंगाधर ब्राह्मणे (वय २०), ऋषिकेश विजय हाडुळे (वय २२, सर्व रा. सुरेवाडी, छत्रपती संभाजीनगर) व दुसऱ्या गटातील कृष्णा एकनाथ ब्रह्मे, दीपक ब्रह्मे, सागर पांढरे, मनोज हारणे, रमेश खेमचंद गुंजाळ (वय २३, रा. जमनज्योती हर्सूल) अशा एकूण १० जणांविरुद्ध गुन्हा दाखल केला आहे. या सर्वांनी लाठ्या काठ्या व धारदार शस्त्रांनी एकमेकांवर हल्ला चढवला. हाणामारी केली. यात सुरेशला धारदार शस्त्राने मारून गंभीर जखमी केले असून, कृष्णाचा पाय दगड मारून फ्रॅक्चर केला आहे, तर रमेशच्या डोक्यात काहीतरी शस्त्राने मारून जखमी केले आहे. इतरही किरकोळ जखमी आहेत. अधिक तपास पोलीस निरीक्षक सचिन सदाफुले करत आहेत.