छत्रपती संभाजीनगर (मेट्रोपोलिस पोस्ट वृत्तसेवा) : डॉ. बाबासाहेब आंबेडकर मराठवाडा विद्यापीठाच्या होस्टेलमध्ये सध्या टवाळखोरांचा सर्रास वावर असतो. ते धिंगाणा घालून विद्यार्थ्यांना वेठीस धरतात. सोमवारी (१७ नोव्हेंबर) रात्री साडेअकराच्या सुमारास त्यांनी हद्दच केली. गोंधळ घालू नका, असे सांगायला विद्यार्थ्याला त्यांनी बॅटने अमानुष मारहाण केली. बेगमपुरा पोलिसांनी ३ ते ४ अनोळखी टवाळखोरांविरुद्ध गुन्हा दाखल केला आहे.
आदर्श अजिनाथ गिते (वय २२, रा. वंजारवाडी, ता. आष्टी, जि. बीड) याने या प्रकरणात तक्रार दिली आहे. तो डॉ. बाबासाहेब आंबेडकर मराठवाडा विद्यापीठात एमएम प्रथम वर्षात शिकत आहे. तो विद्यापीठाच्या छत्रपती शिवाजी महाराज होस्टेलमध्ये राहतो. सोमवारी (१७ नोव्हेंबर) रात्री साडेअकराच्या सुमारास तो रूममध्ये झोपलेला होता. रूम बाहेरून गोंधळ व आरडाओरडा करण्याचा आवाज येत असल्याने आदर्श व त्याचा मित्र नारायण उठले. दरवाजा उघडला. बाहेर मुलांचा घोळका दिसल्याने आदर्शने त्यांना शांत बसा. आम्हाला डिस्टर्ब होत आहे, असे म्हटले.
त्यामुळे संतापलेल्या दोघा- तिघांनी आदर्श व नारायणला शिवीगाळ करण्यास सुरुवात केली. त्यानंतर त्यातील तीन ते चार जणांनी दोघांना हाताचापटाने मारहाण सुरू केली. त्यामुळे आदर्श होस्टेलमध्ये पळू लागला. तेव्हा त्यातील एक मुलगा बॅट घेऊन त्याच्या मागे लागला. आदर्शला पकडून बॅटने बेदम मारहाण केली. त्यानंतर टवाळखोर निघून गेले. त्यानंतर आदर्श व त्याचे होस्टेलचे मित्र बेगमपुरा पोलीस ठाण्यात तक्रार देण्यासाठी आले. पोलिसांनी ३ ते ४ अनोळखी टवाळखोरांविरुद्ध गुन्हा दाखल केला आहे. अधिक तपास पोलीस अंमलदार गोरखनाथ पवार करत आहेत.
.jpg)
