वाळूज MIDC त सुसाट मद्यधुंद ट्रकचालकाचा थरार, आधी ट्रकला उडवले, नंतर रस्त्यालगतच्या ४ दुचाकींना उडवले!; सुदैवाने जिवीत हानी नाही...

छत्रपती संभाजीनगर (मेट्रोपोलिस पोस्ट वृत्तसेवा) : मद्यधुंद ट्रकचालकाने शनिवारी (२३ नोव्‍हेंबर) रात्री साडेनऊच्या सुमारास वाळूज एमआयडीसीत थरार घडवला. सुसाट ट्रक चालवत आधी समोरून येणाऱ्या ट्रकला उडवले, नंतर तिथेच रस्त्यालगत उभ्या केलेल्या ४ दुचाकींना उडवले. यात दुचाकी अक्षरशः चक्काचूर झाल्या आणि लाखो रुपयांचे नुकसान झाले आहे.

नक्की काय घडलं?
एमएच २० जीसी ५१४४ क्रमांकाचा ट्रक रांजणगाव शेणपुंजी फाट्याकडून ई-सेक्टरच्या दिशेने सुसाट आला. एंडुरन्स कंपनीसमोर समोरून येणाऱ्या एमएच २० जीसी ९१८० क्रमांकाच्या ट्रकला तो धडकला. नंतर कामगारांच्या रस्त्यालगत उभ्या केलेल्या मोटारसायकलींना उडवत गेला. यात रतन सुखदेव साळवे, रवी मच्छिंद्र पवार, गौरव संजय आसाबे, सतीश शिंदे यांच्या दुचाकींचा चक्काचूर होऊन लाखो रुपयांचे नुकसान झाले.

नंतर ट्रक फूटपाथवर चढून कंपनीच्या सुरक्षा भिंतीलगत जाऊन थांबला. अपघाताचा मोठा आवाज झाल्याने लोक धावून आले. सर्वांनी ट्रकचालकाला पकडून पोलिसांच्या हवाली केले. चालक नशेत होता. सुरुवातीला ज्या ट्रकला धडक दिली, ते ट्रकचालक प्रदीप आत्माराम चव्हाण यांनी वाळूज एमआयडीसी पोलीस ठाण्यात तक्रार दिली. त्यावरून पोलिसांनी नशेत असलेल्या ट्रकचालकाविरुद्ध गुन्हा दाखल केला आहे. अधिक तपास पोलीस अंमलदार संदीप घाडगे करत आहेत.

कामगारांची पार्किंग रस्‍त्‍यालगत...
विशेष म्‍हणजे, ज्‍या चारही दुचाकींचे नुकसान झाले, त्या रस्‍त्‍यालगत पार्क केलेल्या होत्‍या. कंपनीने कामगारांच्या वाहनांच्या पार्किंगची व्यवस्था करणे गरजेचे असताना कामगारांना त्यांच्या दुचाकी अशा रस्त्यालगत लावाव्या लागत होत्या. परिणामी ट्रकने चार दुचाकी उडवून कामगारांचे मोठे नुकसान केले.