छत्रपती संभाजीनगर (मेट्रोपोलिस पोस्ट वृत्तसेवा) : मुलीच्या प्रेमाला विरोध असलेल्या तिच्या आईनेच साथीदारांसोबत मिळून मुलीच्या प्रियकराचे कारमधून फिल्मीस्टाइल अपहरण करत साथीदारांकरवी त्याला बेदम मारहाण केली. ही धक्कादायक घटना सिडको चौकात शनिवारी (१३ डिसेंबर) दुपारी चारला घडली. जखमी तरुणावर घाटी रुग्णालयात उपचार सुरू आहेत.
विशाल आबासाहेब येडके (वय २३, रा. मिसारवाडी) असे अपहरण झालेल्या तरुणाचे नाव आहे. तो मावशीकडे राहतो. त्याचे मामा सुरेश मोहन नरवडे हे सिडको बसस्थानकासमोर नाश्ता सेंटर चालवतात. त्यांच्याच गाडीवर विशालही काम करतो. सुरेश, विशाल हे मामा-भाचे आणि यश इंगळे, विकी घोरपडे हे नाश्ता सेंटरवर असताना पांढऱ्या कारमधून अपहरणकर्ते आले. सुरेश यांच्या परिचयाच्या शांता नावाच्या महिलेसह कारमधून उतरले. त्यांनी विशालला मारहाण करत बळजबरीने कारमध्ये कोंबले आणि सुसाट पसार झाले.
सुरेश यांनी लगेचच सिडको एमआयडीसी पोलीस ठाण्यात धाव घेऊन प्रभारी पोलीस निरीक्षक अतुल येरमे यांना घडलेला प्रकार सांगितला. येरमे यांनी सहायक पोलीस निरीक्षक कैलास लहाने, पोलीस उपनिरीक्षक लखनसिंग पचलोरे यांच्यासह अपहरणकर्त्यांचा शोध सुरू केला. आधी शांताला ताब्यात घेऊन पोलीस ठाण्यात आणले. तिला पोलिसांनी पकडल्याचे कळताच तीन अपहरणकर्ते घाबरून गेले. त्यांनी विशालला सेव्हन हील उड्डाणपुलाखाली आणून सोडून दिले. तिथून विशालने त्याच्या मामाला कॉल केला. याप्रकरणी अन्य तीन अपहरणकर्त्यांचा रात्री उशिरापर्यंत शोध सुरू असल्याचे पोलीस निरीक्षक अतुल येरमे यांनी सांगितले.
वर्षभरापूर्वी तरुण-तरुणी गेले होते पळून...वर्षभरापूर्वी विशाल आणि तरुणी दोघेही घरातून पळून गेले होते. तेव्हा सुरेश नरवडे यांनी दोघांनाही पोलीस ठाण्यात हजर केले होते. पोलिसांनी दोघांनाही समजावून सांगत तरुणीला तिच्या आईच्या ताब्यात दिले होते. अलीकडच्या काळात मुलीचे लग्न ठरल्याने काही गडबड होऊ नये म्हणून विशालचे अपहरण करून बेदम मारहाण केल्याचा संशय आहे. विशालने पोलिसांना सांगितले, की कारमधून त्याला सातारा परिसरात नेले. आणखी १० ते १२ जणांना बोलावून घेतले आणि त्या सर्वांनी मिळून बेदम मारहाण मारहाण केली.
.jpg)
.jpg)
.jpg)
