कैलासनगरात एमडी ड्रग्ज पकडले, २ तस्करांना अटक, शहर गुन्हे शाखेची २ लाखांची कारवाई

छत्रपती संभाजीनगर (मेट्रोपोलिस पोस्ट वृत्तसेवा) : जिन्सी पोलीस ठाण्याच्या हद्दीत येणाऱ्या कैलासनगरात शहर गुन्हे शाखेने मोठी कारवाई करत २ ड्रग्ज तस्करांना अटक केली. त्यांच्याकडे ९० हजार रुपयांचे एमडी ड्रग्ज मिळून आले. एकूण २ लाख ५ हजार ४५० रुपयांचा मुद्देमाल जप्त करण्यात आला आहे. ही कारवाई शनिवारी (७ मार्च) पहाटे साडेबाराच्या सुमारास (मध्यरात्री) करण्यात आली. राशीद सालमीन दिप (वय २५, रा. बाजयीपुरा ग. नं. १४, छत्रपती संभाजीनगर), फय्याज लतीफ शेख (वय ३०, रा. बायजीपुरा ग. नं.१३) अशी अटक केलेल्यांची नावे आहेत.

शहर गुन्हे शाखेचे पोलीस अंमलदार विजय निकम यांनी याप्रकरणात तक्रार दिली आहे. ते पोलीस उपनिरीक्षक प्रवीण वाघ यांच्या पथकात काम करतात. शुक्रवारी संध्याकाळी साडेसातच्या सुमारास प्रवीण वाघ यांना त्यांच्या गुप्त बातमीदाराकडून बातमी मिळाली, की महापालिकेच्या बंद पडलेल्या व्यायाम शाळेजवळ कैलासनगर येथे दोन जण त्यांच्या मोपेडर एमडी ड्रग्स विक्री करण्यासाठी येणार आहेत. वाघ यांनी ही माहिती पोलीस निरीक्षक गजानन कल्याणकर यांना कळवली. त्यांनी कारवाईचे आदेश दिल्यानंतर सहायक पोलीस निरीक्षक रविकांत गच्चे, पोलीस उपनिरीक्षक प्रवीण वाघ, पोलीस अंमलदार राजेश यदमळ, राहुल बंगाळे, रोहीत जाधव, विजय निकम, अरुण भिसे यांनी छाप्याचे नियोजन केले.

हे पथक कैलासनगरात रात्री साडेदहाच्या सुमारास दाखल झाले. मध्यरात्री १२ वाजून २० मिनिटांनी कैलासनगर स्मशानभूमीकडून संशयित दोन जण मोपेडवरून येताना दिसले. पोलिसांनी त्यांना थांबवले. त्यांची नावे राशीद व फय्याज असल्याचे त्यांनी सांगितले. राशीदच्या अंगझडतीत ९० हजार रुपयांचे एमडी ड्रग्ज मिळून आले. त्याचे वजन प्लॉस्टीकच्या झिपलॉक पिशवीसह ६ ग्रॅम भरले. त्याचा १० हजारांचा मोबाइलही जप्त करण्यात आला. ३०० रुपये रोख मिळून आले. फय्याजच्या अंगझडतीत १० हजारांचा मोबाइल व १५० रुपये रोख मिळून आले.

मोबाइल, पैसेही जप्त करण्यात आले. त्यांच्याकडील ५० हजार रुपयांची मोपेडही (क्र. एमएच २०, जीआर ४३६२) पोलिसांनी ताब्यात घेतली. राशीदला पोलिसांनी विचारले, की ड्रग्ज कोणाकडून खरेदी केले आणि कोणाला विकण्यासाठी आले आहात?  त्यावर त्याने काशीफ रा. कन्नड यांच्याकडून ड्रग्ज खरेदी केल्याचे सांगितले. पोलिसांनी राशीद, फय्याजसह काशीफविरुद्धही जिन्सी पोलीस ठाण्यात गुन्हा दाखल करण्यात आला आहे. अधिक तपास पोलीस उपनिरीक्षक गणेश माने करत आहेत.