व्यापारी गजानन देशमुख यांचा मुलगा इंद्रसेन बेपत्ता; स्‍कूलबस सुटल्याने पालक रागावण्याच्या भीतीने घर सोडल्याची शक्यता!, अपहरणाचा गुन्हा दाखल करून पुंडलिकनगर पोलिसांकडून युद्धपातळीवर शोध सुरू

छत्रपती संभाजीनगर (सीएससीएन वृत्तसेवा) : पुंडलिकनगर पोलीस ठाण्याच्या हद्दीतील सिडको एन ४ च्या तापडिया पार्कमध्ये राहणारे कृषी यंत्रांचे व्यापारी गजानन देशमुख यांचा १४ वर्षीय मुलगा इंद्रसेन बुधवारी (३० जुलै) सकाळी शाळेसाठी बाहेर पडला. त्यानंतर बेपत्ता झाला आहे. या घटनेमुळे खळबळ उडाली असून, गुरुवारी (३१ जुलै) रात्री उशिरापर्यंत इंद्रसेनचा युद्धपातळीवर शोध घेतला जात होता.

इंद्रसेनची बस साधारण ६:५० पर्यंत घरापर्यंत येते. मात्र, झोपेतून उशिरा उठल्याने आठवडाभरातच तीनदा स्कूलबस चुकली. त्यामुळे आई-वडिलांनी समजावूनही सांगितले. बुधवारीही इंद्रसेन ६:५७वाजता पोहोचला अन्‌ बस ६:५० वाजता गेली. त्यामुळे आई-वडील, शिक्षक रागावतील, या भीतीने तो तणावाखाली आला असण्याची शक्यता आहे. त्याला कुणी पळवले तर नाही ना, या दिशेनेही पोलीस करत आहेत.

पाचोडपर्यंत तपास पोहोचला, पुढे कुठे गेला कळेना...
बुधवारी इंद्रसेन शाळेसाठी घराबाहेर पडला होता. मात्र, दुपारी ३ पर्यंतही तो घरी न आल्याने आईने शाळेत संपर्क केला. त्यावर शिक्षकांनी तो शाळेतच आला नाही, असे सांगितले. त्‍यामुळे आई घाबरून गेली. बसचालकाला विचारणा केली असता त्याने तो बसमध्येही आला नसल्याचे सांगितल्याने कुटुंब भांबावले. त्यांनी तातडीने पुंडलिकनगर पोलीस ठाण्यात धाव घेतली. पोलीस निरीक्षक अशोक भंडारे यांनी प्रकरण गांभीर्याने घेत अपहरणाचा गुन्हा दाखल करत सहायक फौजदार सुनील म्हस्के यांना इंद्रसेनचा शोध घेण्याचे आदेश दिले. इंद्रसेन घरातून थेट सिडको बसस्थानकावर गेला, तिथे एकाला बीडला जायचे असल्याचे सांगून पाचोडपर्यंत गेला. पुढे तो कुठे गेला, हे अद्याप तपासात समोर आलेले नाही.