दोन वेगवेगळ्या घटना : वाळूज एमआयडीसीत दुचाकीसह शेतकऱ्याचा विहिरीत पडून मृत्यू, घाटीजवळील गर्ल्स होस्टेलजवळ आढळला मृतदेह

छत्रपती संभाजीनगर (मेट्रोपोलिस पोस्ट वृत्तसेवा) : वाळूज एमआयडीसी पोलीस ठाण्याच्या हद्दीतील कासोडा शिवारात जुन्या पडीक विहिरीत दुचाकीसह पडून ४० वर्षीय शेतकऱ्याचा मृत्यू झाला. ही घटना रविवारी (७ डिसेंबर) सकाळी घडली. सुभान शहबीर पठाण (रा. तुर्काबाद, खराडी) असे मृत्यू झालेल्याचे नाव आहे.

पठाण यांची कासोडा शिवारात शेती असून, मोटर सुरू करण्यासाठी ते विहिरीजवळ गेले होते. दुचाकी विहिरीच्या कडेला उभी करताना तोल गेल्याने ते दुचाकीसह विहिरीत पडले. ते पाहून त्यांच्या पत्नीने आरडाओरड केली. त्यामुळे आसपासचे शेतकरी धावून आले. त्यांनी पठाण यांना दोरीच्या साहाय्याने बाहेर काढून छत्रपती संभाजीनगर येथील घाटी रुग्णालयात दाखल केले. मात्र डॉक्टरांनी तपासून मृत घोषित केले. घटनेची नोंद वळूज एमआयडीसी पोलिसांनी घेतली आहे. अधिक तपास सुरू आहे.

गर्ल्स होस्टेलसमोर अनोळखी मृतदेह आढळला
यूजी गर्ल्स होस्टेल ते पानचक्कीकडे जाणाऱ्या रस्त्यावरील फुटपाथवर अनोळखी व्यक्तीचा मृतदेह आढळला आहे. बेगमपुरा पोलिसांनी आकस्मिक मृत्यूची नोंद केली आहे. शनिवारी (६ डिसेंबर) सकाळी साडेनऊला ही घटना समोर आली. मृतकाचे वय अंदाजे ५० वर्षे असून अंगकाठी सडपातळ, उंची ५ फूट ३ इंच, रंग काळा, दाढी काळी, अंगात जिन्स पॅन्ट, निळे आणि पांढरे लायनिंगचे शर्ट, निळे जर्किन अशा वर्णनाच्या व्यक्तीला कोणीही ओळखत असेल तर त्यांनी बेगमपुरा पोलिसांशी संपर्क साधावा, असे आवाहन सहायक फौजदार डी. टी. सोनवणे यांनी केले आहे.