छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : रुचिका अजित जैन... वय ४८... रा. धरमपूर, ता. छत्रपती संभाजीनगर... सैन्य दलात कॅप्टन असल्याचे भासवून लोकांना फसवत असल्याने दौलताबाद पोलिसांनी गुरुवारी (११ सप्टेंबर) सकाळी ११ वाजता तिला अटक केली. त्यानंतर लष्कराच्या गुप्तचर खात्याने आणि दहशतवादविरोधी पथकाने (एटीएस) तिची शुक्रवारी (१२ सप्टेंबर) कसून चौकशी केली. तिने असे वागण्याचे कारण त्यांना सांगितले आहे. तिच्याविरुद्ध दाखल केलेले गुन्हे जामीनपात्र असल्याने नोटीस देत पुन्हा चौकशीसाठी राहण्यासाठी बजावण्यात आले आहे.
रुचिकाला सैन्य दलात भरती व्हायचे होते. मात्र तिचे ते स्वप्न पूर्ण झाले नाही. काही काळ तिने दिल्लीत सुरक्षारक्षक म्हणून नोकरी केली. याचदरम्यान बोगस कॅप्टन म्हणून फिरण्याचे भूत तिच्या डोक्यात संचारले. रुचिका मूळची जळगाव जिल्ह्यातील चोपडा येथील आहे. मुंबईतही तिने रांगोळ्या काढणे, शिवणकाम केले आहे. २०२० मध्ये तिने दौलताबाद परिसरात जमीन घेऊन घर बांधले. पोलिसांनी आता तिच्या संपत्तीचीही चौकशी करत आहेत. तिच्या बँक खात्याचीही माहिती घेतली जाणार असून, व्यवहार तपासण्यात येणार आहेत. दौलताबाद पोलिसांनी दाखल केलेले गुन्हे जामीनपात्र असल्याने अटकेची तरतूद नाही. त्यामुळे नोटीस देऊन सोडून द्यावे लागले. रुचिका ही रुचिका माँ म्हणूनही परिचित होती. अलिशान घर, पद्मावती देवीचे मंदिर व आश्रम अशा वैभवात ती वावरत होती. तीन महिन्यांपूर्वी लष्कराच्या गुप्तचर खात्याला तिच्या खोट्या गणवेशाची माहिती मिळाली होती. अधिक तपास पोलीस उपनिरीक्षक सुनील बोडखे करत आहेत.
अशी केली होती अटक...रुचिका दौलताबादसह परिसरात भारतीय सैन्य दलात कॅप्टन असल्याचे सांगायची आणि लष्करी गणवेशात फिरत होती. पुणे येथील मिलिटरी इंटेलिजन्स विभागाच्या अधिकाऱ्यांनी दौलताबाद पोलिसांच्या सहाकार्याने तिला पकडले. तिच्या धरमपूर गावातील घरावर छापा मारला तेव्हा ती आर्मी युनिफॉर्ममध्येच होती. कसून चौकशी केल्यानंतर तिच्याकडे कोणतीही अधिकृत कागदपत्रे नव्हती. सैन्य दलाशी तिचा प्रत्यक्ष संबंधही नव्हता. घरझडतीत पॅरा फोर्सचे चिन्ह, ३ स्टार असलेला आर्मी युनिफॉर्म, रूचिका जैन नावाची नेम प्लेट, स्पेशल फोर्सचा लाल पट्टा, कॅप, बेल्ट, शूज, ग्लोज, फेस मास्क, मोजे, डेबोनिअर द सिक्युरीटी पिपल नावाचे बनावट आयकार्ड, ५.५ मिमी हॉक टॉय एअर पिस्टल, ई.एस.ए ६५ स्पोर्ट्स एअर रायफल, ट्रॉफी आढळली. स्वतःला सैन्यात कॅप्टन असल्याचे सांगत असल्याने विविध संस्था, शाळा, कोचिंग क्लासेसही तिचा सत्कार ठेवत होते. विशेष म्हणजे, सैन्यदलात गुप्तचर अधिकारी असल्याचे सांगून सध्या गुप्त मोहिमेवर असल्याचे ती उघडपणे सांगत होती.
.jpg)
.jpg)
