छत्रपती संभाजीनगरात हायटेक पद्धतीने महागड्या कार चोरणारी टोळी!; आणखी दोन महागड्या कार केल्या गायब... कसे करतात चोरी, काय आहे तंत्रज्ञान...

छत्रपती संभाजीनगर (मेट्रोपोलिस पोस्ट वृत्तसेवा) : हायटेक पद्धतीने काही मिनिटांत कार चोरून नेणारी टोळी छत्रपती संभाजीनगर शहरात सक्रीय झाली आहे. गेल्या सहा दिवसांत अशी दुसरी घटना समोर आली असून, आता न्यू श्रेयनगर व उस्मानपुऱ्यातून मंगळवारी (१७ फेब्रुवारी) रात्रीतून अवघ्या अर्ध्या तासात २५ लाखांच्या दोन कार चोरट्यांनी गायब केल्या आहेत. या घटनांमुळे खळबळ उडाली आहे.

न्यू श्रेयनगरमधील रहिवासी सिव्हिल कॉन्ट्रॅक्टर सागर तिवारी यांनी २०२३ मध्ये टाटा हॅरिअर कार खरेदी केली होती. घरासमोर पार्किंग नसल्याने ते त्यांची कार मित्र व नगरसेवक राजू वैद्य यांच्या घरासमोर उभी करत होते. मंगळवारी रात्री त्यांनी नेहमीप्रमाणे कार वैद्य यांच्या घरासमोर उभी केली होती. चोरांनी काच फोडून ३ वाजून २६ मिनिटांनी अवघ्या १० मिनिटांत कार लंपास केली. दोन चोर सीसीटीव्ही कॅमेऱ्यात कैद झाले असून, चोरांच्या हातात टॅब, ओबीडी डिव्हाइस, रिलेबॉक्स दिसला आहे. या घटनेच्या अर्ध्या तासानंतर दशमेशनगरातील विवेकानंद भोसले यांची टाटा हॅरिअर कारदेखील पहाटे चारला चोरट्यांनी चोरून नेली.

दोन्ही घटनांत उस्मानपुरा पोलिसांनी गुन्हा दाखल केला आहे. बुधवारी (१८ फेब्रुवारी) सकाळी या दोन्ही घटना समोर आल्या. वैद्य यांच्या पत्नीला घरासमोर काचा आढळल्याने त्यांनी सागर तिवारी यांच्या पत्नीला विचारणा केली. सागर तेथे आले, तेव्हा कार चोरीला गेल्याचे समोर आले. यापूर्वी ११ फेब्रुवारीलाही उस्मानपुरा, जवाहरनगर परिसरातून दोन कार अशाच पद्धतीने चोरीला गेल्या होत्या. त्‍यामुळे अशा हायटेक पद्धतीने महागड्या कार चोरी करणारी टोळी शहरात सक्रीय असल्याचे दिसून येत असून, यामुळे वाहनमालकांत खळबळ उडाली आहे.

काय आहे ओबीडी आणि रिले बॉक्स...
ओबीडी डिव्हाइस (On Board Diagnostics) हे उपकरण वाहनातील संगणक प्रणालीशी जोडले जाणारे आहे. ते सर्व आधुनिक गाड्यांमध्ये असते. ते इंजिनमधील त्रुटी तपासते. Check Engine लाईट का लागला हे सांगते, गाडीचे परफॉर्मन्स डेटा (स्पीड, RPM, इंधन वापर) दाखवते. ड्रायव्हर सीटखाली डॅशबोर्डजवळ OBD पोर्ट असतो, तिथे हे डिव्हाइस प्लग करतात. रिले बॉक्स (Relay Box) हा इलेक्ट्रॉनिक सर्किट बॉक्स असतो, जो गाडीतील सिग्नल पुढे पाठवण्याचे काम करतो. आजकाल काही चोरटे Keyless Entry असलेल्या गाड्यांमध्ये Relay Attack करतात. एक व्यक्ती घराजवळील कारच्या चावीचा सिग्नल पकडतो. तो सिग्नल रिले बॉक्सने वाढवून गाडीपर्यंत पोहोचवतो. गाडीला वाटते की चावी जवळ आहे. दरवाजा उघडतो आणि गाडी स्टार्ट होते. त्यामुळे ही पद्धत चोरीसाठी वापरली जाते.
काय कराल?
Keyless चावी Faraday pouch मध्ये ठेवा. OBD पोर्ट लॉक बसवा. गाडीत अतिरिक्त स्टिअरिंग लॉक वापरा. सुरक्षित पार्किंग करा.