छत्रपती संभाजीनगर पोलिसांकडून ‘बुलेटराजां’वर कारवाईचा दणका

सायलन्सरविरोधात मोहीम : १४१ दुचाकीचालकांवर कारवाई, १०० वर सायलन्सर बदलले

On 18 Feb 2026

छत्रपती संभाजीनगर पोलिसांकडून ‘बुलेटराजां’वर कारवाईचा दणका

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : स्पोर्टस बाईक, बुलेटच्या कंपनीवर फटाफट आवाज करत शहरातून ‘राजा’च्या तोऱ्यात फिरणाऱ्या बुलेटराजांवर पोलिस प्रशासनाने कारवाईचा बडगा उगारला आहे. सायलेन्सरमध्ये बदल करून कर्णकर्कश आवाज करत फिरणाऱ्या १४१ टवाळखोरांवर अवघ्या चार तासांत कारवाई करून ९६ सायलन्सर जागीच बदलण्यात आल्याची माहिती सहायक पोलिस आयुक्त (वाहतूक) सुभाष भुजंग यांनी दिली.

बुलेट, स्पोर्टस बाईकच्या मूळ सायलन्सरमध्ये बदल करून फटाक्यासारखे आवाज करणारे सायलन्सर लावून कर्कश आवाज करत “बुलेटराजा” शहरभर सुसाट फिरतात. शहरातील बहुतांश मुख्य रस्त्यांवर टवाळखोरांच्या दुचाकीचा वेग आणि आवाजाने हृदयात धडकी भरते. लहान मुले, वृद्धांसह रुग्णांनाही याचा प्रचंड त्रास होतो. मनपा निवडणूक व व्हीआयपींच्या बंदोबस्तात व्यस्त राहिलेल्या वाहतूक पोलिसांनी पुन्हा अशा टवाळखोरांवर कारवाईचा बडगा उगारला आहे. सोमवारी दुपारी ४ ते रात्री ८ या वेळेत शहरातील ही तपासणी मोहीम राबवली. पोलिस आयुक्त प्रवीण पवार, उपायुक्त शर्मिला घारगे-वालावलकर यांच्या सूचनेवरून निरीक्षक अविनाश आघाव, अमोल देतकर, राजेश यादव, सुनील कराळे, सचिन मिरधे, हरेश्वर घुगे, उत्तरेश्वर मुंढडे, संभाजी गोरे, शरद वाघुळे यांनी कारवाई पार पाडली.

अशी केली कारवाई
*एकूण २४४ दुचाकीचालकांच्या सायलन्सरची तपासणी.
*१४१ दुचाकीचालकांना १ लाख ४३ हजारांचा दंड.
*१ लाख २८ हजार १०० रुपयांचा दंड जागीच वसूल.
*दंड भरण्यास नकार देणाऱ्या ७ दुचाकी जप्त.
*मूळ सायलन्सर बदललेले ९७ दुचाकींचे सायलन्सर जागेवर बदलण्यात आले.