छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : इन्स्टाग्रामवर ओळख झाल्यानंतर ओळखीचे रुपांतर प्रेमात झाले. कालांतराने तिने त्याच्याशी ब्रेकअप केले. मात्र तोपर्यंत प्रेम डोक्यात शिरलेल्या प्रियकराने प्रेमाचा हट्ट करत तिला धमकावयाला सुरुवात केली. तिच्या वडिलांनाही कॉल करून धमकावले. अखेर तिने करमाड पोलीस ठाणे गाठून प्रियकराविरुद्ध शुक्रवारी (७ नोव्हेंबर) तक्रार दिली आहे.
१९ वर्षांची श्रुती (नाव बदलले आहे) छत्रपती संभाजीनगर तालुक्यातील एका गावातील रहिवासी आहे. तिचे शिक्षण १२ वी पर्यंत छत्रपती संभाजीनगर तालुक्यातील शेवगा येथे झाले. सध्या ती छत्रपती संभाजीनगर शहरातील टीव्ही सेंटर भागात पोलीस भरतीची तयारी करत आहे. तिच्याकडे सॅमसंग कंपनीचा मोबाइल असून, त्याद्वारे ती तिचे इन्स्टाग्राम खाते चालवते. त्यावर सहा महिन्यांपूर्वी प्रमोद प्रल्हाद काकड (रा. वाकी खुर्द ता. सिंदखेड राजा) याच्यासोबत तिची ओळख झाली. त्याने तिचा मोबाइल नंबर घेतला. त्यानंतर दोघे एकमेकांसोबत कॉलवर बोलू लागले. श्रुतीच्या तक्रारीनुसार, ती त्याच्याशी जास्त बोलत नव्हती. मात्र तो नेहमी कॉल करून बोलत असे.
ओळख झाल्यावर तो तिला भेटायला छत्रपती संभाजीनगरला टीव्ही सेंटर येथे आला. त्यावेळी दोघांनी मोबाइलमध्ये फोटोही काढले. १७ ऑक्टोबरला सकाळी १० ला दिवाळीसाठी श्रुती गावी गेली असता प्रमोद काकड तिला वारंवार कॉल करून माझ्याशी फोनवर बोल. मी तुझ्यावर प्रेम करतो, असे म्हणू लागला. त्यावर ती त्याला म्हणायची, की तू मला फोन करू नको. मला तुझ्याशी काही बोलायचे नाही. तू मला वारंवार फोन करत जाऊ नको.
तरीही तो तिला वारंवार फोन करत असल्याने तिने त्याचा मोबाइल नंबर ब्लॉक केला. त्यानंतर तो श्रुतीच्या वडिलांच्या मोबाइलवर कॉल करू लागला. तिच्या वडिलांना म्हणाला, की मला तुमच्या मुलीसोबत लग्न करायचे आहे. त्यानंतरही तिची इच्छा नसताना तिला कॉल करून तिचा पाठलाग करत होता. शुक्रवारी (७ नोव्हेंबर) सकाळी साडेदहाला पुन्हा त्याने तिच्या वडिलांच्या फोनवर कॉल केला व धमकावले, की माझे लग्न तुमच्या मुलीसोबत लावून द्या. नाहीतर तिला मी मारून टाकेन. त्यामुळे घाबरलेल्या श्रुतीने करमाड पोलीस ठाणे गाठून प्रमोदविरुद्ध तक्रार दिली. त्यावरून पोलिसांनी गुन्हा दाखल केला आहे.
.jpg)
.jpg)
