मोठी बातमी : छत्रपती संभाजीनगरच्या जस्ट पॅक इंडस्ट्रीज कंपनीला भीषण आग

छत्रपती संभाजीनगर (मेट्रोपोलिस पोस्ट वृत्तसेवा) : बिडकीन पोलीस ठाण्याच्या हद्दीतील गाढेगाव येथील जस्ट पॅक इंडस्ट्रीज या पेपर रोल तयार करणाऱ्या कंपनीला आज, ८ फेब्रुवारीला दुपारी एकच्या सुमारास भीषण आग लागली. आग इतकी मोठी आहे, की सायंकाळी सात वाजले तरी पूर्णपणे विझविण्यात अग्निशमन विभागाला यश आले नव्हते.

आगीचे लोळ आणि धुराचे प्रचंड लोट परिसरात पसरल्याने नागरिकांमध्ये घबराट निर्माण झाली आहे. आग आटोक्यात आणण्यासाठी मनपाचे दोन अग्निशमन बंब तसेच वाळूज एमआयडीसीचे दोन बंब असे एकूण चार बंब घटनास्थळी आहेत. सायंकाळी ७ पर्यंत आग विझव्णियाचे शर्थीचे प्रयत्न सुरू होते. वाळूज एमआयडीसी अगिशमन दलाचे उप अग्निशमन अधिकारी अनिल देशमुख यांनी छत्रपती संभाजीनगर सीटी न्यूजशी बोलताना सांगितले, की सायंकाळी ६ पर्यंत आग पूर्णतः आटोक्यात आलेली नाही. परिसरात पाण्याची उपलब्धता कमी असल्याने आग विझवताना मोठ्या अडचणी येत आहेत. आग विझविण्याच्या मोहिमेत वाळूज एमआयडीसी अग्निशमन दलाचे अनिल देशमुख (Sub Fire Officer), के. टी. सूर्यवंशी (Fire Leader), एस. जी. वासनिक, योगेश काळे (Operator), सुनील पाटील, पी. एस. खाडे, एस. टी. मुळे, एस. बी. सोनवणे, पी. के. राठोड, व्ही. एस. दाभाडे आदी जवान प्रयत्नशील आहेत. दरम्यान, आगीत कोट्यवधी रुपयांचे नुकसान झाल्याचा अंदाज असून, ऑडिटनंतरच निश्चित आकडा समोर येईल, असे सूत्रांनी सांगितले. आगीत कोणीही जखमी झाले नसल्याचे सायंकाळी ७ पर्यंत समोर आले. आगीचे नेमके कारणही अद्याप समोर आलेले नाही.