बजाजनगरात मतदान केंद्रावर १०० मीटरच्या नियमावरून गोंधळ; पोलिसांचा हस्तक्षेप, चौघांना बोगस मतदानाच्या संशयावरून पकडले!

छत्रपती संभाजीनगर (मेट्रोपोलिस पोस्ट वृत्तसेवा) : जिल्हा परिषद, पंचायत समिती निवडणुकीसाठी मतदानादरम्यान बजाजनगरातील लाल बहादूर शास्त्री केंद्रावर सकाळी ११ च्या सुमारास दोन राजकीय पक्षांचे कार्यकर्ते भिडल्याने वातावरण तणावपूर्ण बनले. ठाकरे गटाचे पंचायत समिती गणाचे उमेदवार ललिता सोनवणे यांचा शिंदे गटाच्या कार्यकर्त्यांशी वाद झाला.

मतदान केंद्रापासून १०० मीटरच्या एका उमेदवाराने पार्टी बूथ लावल्याचा आरोप करण्यात आला. आचारसंहितेनुसार मतदान केंद्राच्या १०० मीटर परिसरात पार्टी बूथ लावणे किंवा गर्दी करण्यास मनाई आहे. याच मुद्द्यावरून दोन्ही बाजूंचे कार्यकर्ते आक्रमक झाले होते. परिस्थिती हाताबाहेर जाण्याच्या शक्यतेने पोलिसांनी तत्काळ घटनास्थळी धाव घेतली. सहाय्यक पोलीस निरीक्षक अरविंद शिंदे, पोलीस अंमलदार नितीन सगरे आणि निवडणूक प्रशासनाने वेळीच हस्तक्षेप केला. त्यामुळे अनुचित प्रकार टळला. उमेदवार ललिता सोनवणे यांनी निवडणूक आयोगाच्या अधिकाऱ्यांशी संपर्क साधून पुन्हा एकदा अधिकृत १०० मीटरची मार्किंग करून घेतली. त्यानंतर पोलिसांच्या उपस्थितीत संबंधित पार्टीचे बूथ हटवण्यात आले. परिसरात पोलिसांचा कडक बंदोबस्त ठेवण्यात आला आहे

बोगस मतदानाच्या संशयावरून चौघे ताब्यात
बजाजनगरमध्ये दोन वेगवेगळ्या मतदान केंद्रांवर चार जणांना बोगस मतदानाच्या संशयावरून पोलिसांनी ताब्यात घेतले. मोरे चौक येथील दगडोजीराव देशमुख कॉलेज मतदान केंद्रावर रोहन चंद्रकांत वाहुलकर (वय २१) आणि बन्सी उमाप (वय २१, रा. भावसिंगपुरा, संभाजीनगर), तर राजा शिवाजी शाळेतील मतदान केंद्रावरही दोघांना पकडण्यात आले. प्राथमिक माहितीनुसार, प्रत्येकी ३ हजार रुपये घेऊन बोगस मतदान केले जात असल्याची गोपनीय माहिती पोलिसांना मिळाली होती. त्यांच्या संशयास्पद हालचाली लक्षात येताच पोलिसांनी ताब्यात घेतले. त्यांची सखोल चौकशी केली जात आहे.