छत्रपती संभाजीनगर (सीएससीएन वृत्तसेवा) : गुजरातमधून सहा महिन्यांच्या चिमुकलीचे अपहरण करून हैदराबादच्या व्यापाऱ्याला विकण्यासाठी नेत असताना चौघांच्या मुसक्या छत्रपती संभाजीनगर रेल्वेस्थानकावर आवळण्यात पोलिसांना यश आले. शहर गुन्हे शाखेने गुजरात पोलिसांच्या मदतीने गुरुवारी (३१ जुलै) ही कारवाई केली. मानवी तस्करीचे मोठे रॅकेट यामागे असण्याची शक्यता पोलिसांनी वर्तवली आहे.
जयेश त्रिकम राठोड (वय २६), बिमल प्रफुल्लकुमार सोलंकी (वय ३०), मनीषा महेश सोलंकी (वय २९, सर्व रा. गुजरात) व समाधान केवल जगताप (वय ३२, रा. नाशिक) अशी अटक केलेल्यांची नावे असल्याचे शहर गुन्हे शाखेचे पोलीस निरीक्षक संभाजी पवार यांनी सांगितले. चिमुकलीचे आई-वडील मूळचे राजस्थानचे आहेत. रामसिंग बगाडिया ढोलका (अहमदाबाद) येथे फुगे विकतात. मंगळवारी (२९ जुलै) ते घरी आले. मध्यरात्री १ ला कुटुंब झोपी गेले. बुधवारी (३० जुलै) पहाटे अंथरुणावर त्यांची ६ महिन्यांची मुलगी दिसली नाही. त्यांनी मुलीचा शोध घेतला, पण ती न सापडल्याने तातडीने ढोलका पोलीस ठाण्यात धाव घेतली. पोलिसांनी तातडीने सीसीटीव्ही फूटेज व तांत्रिक तपासाच्या आधारे मुलीचा शोध सुरू केला. अपहरणकर्ते महाराष्ट्राच्या दिशेने गेले असून, छत्रपती संभाजीनगरमार्गे रेल्वेने हैदराबादला जाणार असल्याचे कळताच गुजरातच्या वरिष्ठ पोलीस अधिकाऱ्यांनी छत्रपती संभाजीनगरच्या पोलीस आयुक्त प्रवीण पवार यांना कळवले. त्यांनी तत्काळ शहर गुन्हे शाखेचे निरीक्षक संभाजी पवार, पोलीस उपनिरीक्षक संदीप शिंदे यांना कारवाईच्या सूचना केल्या. त्यांनी सहकाऱ्यांसह रेल्वेस्थानक गाठले. अपहरणकर्ते खासगी बसने छत्रपती संभाजीनगरला आल्यांनतर नगरसोल रेल्वेने हैदराबादला जाणार असल्याचा संशय होता. रेल्वेत बसण्याआधीच पोलिसांनी सीसीटीव्ही फूटेजच्या आधारे अपहरकर्त्यांपैकी तिघांना पकडले. चिमुकलीची सुखरुप सुटका केली. एक जण पळून जाण्यात यशस्वी झाला, करमाडजवळ त्याने रेल्वेतून उडी मारण्याचा प्रयत्न केला, त्यावेळी त्याला अटक करण्यात आली. जयेशविरुद्ध यापूर्वीही अपहरणाचा गुन्हा दाखल आहे. त्यामुळे तो मानवी तस्करीचे रॅकेट चालवत असल्याचा संशय आहे. समाधान नाशिकचा केटरिंग व्यावसायिक असून, जयेशसोबत ओळख झाल्यानंतर त्याने त्याच्या हैदराबादच्या परिचयातील व्यापाऱ्यासाठी मुलीची मागणी केली. दीड लाख रुपयांत मुलगी चोरून हैदराबादपर्यंत पोहोचवण्याचे त्यांच्यात ठरले होते. मात्र पोलिसांनी वेळीच सर्वांच्या मुसक्या आवळल्या.
