छत्रपती संभाजीनगर (सीएससीएन वृत्तसेवा) : ४ वर्षे ‘लिव्ह इन रिलेशनशीप’मध्ये राजरोस संबंध ठेवले. तिने लग्‍नाची मागणी करताच संतापलेल्या प्रियकराने बेल्ट, कुऱ्हाडीच्या दांड्याने तरुणीला बेदम मारहाण केली. ही खळबळजनक घटना बुधवारी (३० जुलै) वाळूज एमआयडीसीतील कमळापूरमध्ये समोर आली आहे. यात तरुणीच्या उजव्या हाताचे बोट फ्रॅक्चर झाले असून, तिला जीवे मारण्याची धमकी देण्यात आल्याचे तरुणीने तक्रारीत म्‍हटले आहे. वाळूज एमआयडीसी पोलिसांनी तिचा प्रियकर व त्याचा अशा दोघांविरुद्ध गुन्हा दाखल केला आहे.
प्रियकर दत्तू रामचंद्र दुबिले आणि त्याचा मित्र योगेश इथापे (दोघे रा. जोगेश्वरी, गंगापूर) अशी संशयितांची नावे आहेत. २७ वर्षीय तरुणी पतीपासून विभक्‍त रांजणगाव शेणपुंजीतील नर्सरी कॉलनीत दोन मुले आणि आईसह राहते. ती खासगी नोकरी करते. चार वर्षांपूर्वी तिची दत्तूसोबत ओळख झाली. ओळखीतून मैत्री झाली. नंतर त्याने ‘तुला व मुलांना सांभाळतो, घर देतो,’ असे आमिष दाखवून प्रेमसंबंध प्रस्थापित केले. दोघे एकत्र राहू लागले. मात्र गेल्या काही महिन्यांपासून दत्तू तिच्यावर संशय घेऊन मारहाण आणि शिवीगाळ करत होता. बुधवारी रात्री साडेआठला तरुणी घराशेजारील किराणा दुकानावर गेली असताना दत्तू व त्याचा मित्र योगेश दुचाकीने आले.
तुला घर दाखवतो, असे म्हणत त्यांनी तिला दुचाकीवर बसवले आणि कमळापूर परिसरातील शेतातील पत्र्याच्या शेडमध्ये नेले. तेथे डांबून ठेवत तिला कमरेचा बेल्ट व कुऱ्हाडीच्या दांड्याने बेदम मारहाण करायला सुरुवात केली. तुला घर हवे आहे का?, असे म्हणत तो बेदम मारहाण करत होता. पोलिसांत तक्रार केली तर जीवे मारीन, अशी धमकी तरुणीला दिली. घाबरलेल्या तरुणीने दुसऱ्या दिवशी सकाळी आईला घडलेला प्रकार सांगितला. त्यानंतर दोघी मायलेकी पोलीस ठाण्यात आल्या. पोलिसांनी तिला वैद्यकीय तपासणीसाठी घाटी रुग्णालयात पाठवले. तिच्या तक्रारीवरून दत्तू आणि योगेशविरुद्ध गुन्हा दाखल केला आहे.
