छत्रपती संभाजीनगर (सीएससीएन वृत्तसेवा) : बंद पडलेल्या कंटेनरवर मागून तीन ट्रॅव्हल्स बस येऊन धडकल्या. यात एका ट्रॅव्हल्स बसमधील नागपूरहून पुण्याला जाणारी तरुणी जखमी झाली. अपघाताची नोंद चिकलठाणा पोलिसांनी घेतली आहे. घटना शनिवारी (१७ ऑगस्ट) मध्यरात्रीनंतर दीडच्या सुमारास छत्रपती संभाजीनगर- जालना रोडवर शेंद्रा परिसरात घडली.
जालना रस्त्यावर कंटेनर नादुरुस्त असल्यामुळे थांबला होता. तो रस्त्याच्या बाजूला घेण्याची गरज असताना चालकाने मेकॅनिकच्या बाजूने तिथेच ट्रक दुरुस्तीचा प्रयत्न सुरू केला. त्याचवेळी मागून आलेला दुसरा एक ट्रक सुरक्षित अंतरावर येऊन थांबला. त्यानंतर काही वेळाने त्याच्यामागे बाबा ट्रॅव्हल्सची गाडी येऊन थांबली. त्याच्या मागेच संगीतम ट्रॅव्हल्सच्या दोन गाड्या होत्या. त्यातील एक गाडी बाबा ट्रॅव्हल्सवर आदळली. त्यामुळे बाबा ट्रॅव्हल्सची गाडी ट्रकवर जाऊन आदळली. त्याचवेळी शेवटची गाडीही या गाड्यांवर आदळली.
या अपघातात बाबा ट्रॅव्हल्सच्या गाडीचे मागून पुढून नुकसान झाले. ट्रॅव्हल्समधील नेहा नीलेश राकडे (रा. मानेवाडा, जि. नागपूर) या तरुणीच्या मानेला धक्का बसल्याने ती जखमी झाली. तिच्यावर शहरात उपचार केल्यानंतर पुण्याला नातेवाइक डॉक्टरांकडे हालविण्यात आल्याची माहिती पोलीस निरीक्षक रविकिरण दरवाडे यांनी दिली. पोलिसांनी अपघातग्रस्त वाहने पोलीस ठाण्यात जमा केली आहेत. अपघातानंतर तिन्ही वाहने रस्त्याच्या मधोमध असल्याने जालन्याकडून येणाऱ्या मार्गावर वाहतूक कोंडी झाली होती. चिकलठाणा पोलिसांनी वेळीच धाव घेऊन वाहतूक रस्त्याच्या दुसऱ्या बाजूने वळवली.
.jpg)
