छत्रपती संभाजीनगर (सीएससीएन वृत्तसेवा) : लाडगाव-करमाडजवळील रेल्वेपटरीवर सिमेंटचे ढापे, दगड ठेवून रेल्वेचा मोठा अपघात घडविण्याचा कट उघडकीस आल्यानंतर स्थानिक पोलिसांसह रेल्वे सुरक्षा बल अलर्ट मोडवर आले असून, कट रचणाऱ्यांचा शोध घेतला जात आहे. घटनास्थळाच्या परिसरातील सीसीटीव्ही कॅमेऱ्यांची तपासणी केली जात आहे. रेल्वे सुरक्षा बलाने रेल्वे रुळावर रात्रीची गस्तही वाढविली आहे.
या प्रकरणात स्थानिक लोकांशी संवाद साधून माहिती घेतली जात आहे. स्थानिक पोलिसांकडून घटनेचा तपास सुरू असताना रेल्वे सुरक्षा बलानेही चौकशी आणि आरोपीचा शोध घेण्यासाठी पथक नेमल्याची माहिती सूत्रांनी दिली.
काय घडली होती घटना…सोमवारी (२३ सप्टेंबर) पहाटे एकला (मध्यरात्री) लाडगाव- करमाड शिवारात असलेल्या रेल्वे पटरीवर कोणीतरी सिमेंट काँक्रिटचे मोठ्या आकाराचे ढापे टाकल्याचे समोर आले होते. नंदीग्राम एक्स्प्रेस ही छत्रपती संभाजीनगरवरून जालन्याकडे जात असताना ही रेल्वेचालकाच्या लक्षात आली. त्याने अपघात टाळण्यासाठी आपत्कालीन ब्रेकचा वापर करून गाडी थांबवण्याचा प्रयत्न करूनही रेल्वेचे ब्रेक लावूनही गाडी रेल्वे पटरीवर ठेवलेल्या मोठ्या सिमेंटच्या ढाप्यांना जाऊन आदळली. त्यामुळे रेल्वे पटरीचे तसेच रेल्वे इंजिनचे कॅटलगार्डचे नुकसान झाले होते.
अपघातानंतर रेल्वेपटरीवर मध्यभागी सिमेंट काँक्रिटचे ढापे अस्ताव्यस्त तुटफूट होऊन १०० मीटरपर्यंत विखुरलेले होते. केबल मार्करही पटरीच्या बाजूला तुटफूट होऊन पडलेला होता. धडकेमुळे व लावलेल्या ढाप्यामुळे पटरीला लावलेल्या १५ ते २० ईआरसी क्लीप व लाईनर रेल्वे पटरीपासून वेगळे होऊन पडलेले होते. कोणीतरी अज्ञात लोकांनी पटरीवरून रेल्वे घसरून अपघात होऊन रेल्वेमधील लोकांचा मृत्यू घडविण्याच्या दृष्टीने हे कृत्य केल्याचे समोर आले. करमाड पोलिसांनी कटकारस्थान रचणाऱ्या अज्ञात लोकांविरुद्ध गुन्हा दाखल केलेला आहे.
.jpg)
