छत्रपती संभाजीनगरहून गोव्यासाठी पहिले विमान झेपावले!; असे आहे वेळापत्रक…

छत्रपती संभाजीनगर (सीएससीएन वृत्तसेवा) : छत्रपती संभाजीनगरहून गोव्यासाठी आता थेट विमान उपलब्‍ध झाले आहे. इंडिगो कंपनी आठवड्यातून तीन दिवस मंगळवार, गुरुवार आणि शनिवारी ७८ प्रवासी क्षमतेचे विमान सुरू केले आहे.

लखनऊ-नागपूर-छत्रपती संभाजीनगर-गोवा अशी ही विमानसेवा असणार आहे. आज, २ जुलैला शुभारंभाच्या पहिल्याच विमानाने शहरातील पर्यटन आणि उद्योजक सकाळी ११ ला विमानात बसले. ते दुपारी दीडला गोव्यात पोहोचतील. परतीसाठी गोवा येथून दुपारी २.१० वाजता हेच विमान असून, सायंकाळी ४.१० वाजता चिकलठाणा विमानतळावर पोहोचेल. आठवड्यातून तीन दिवस शहरवासीयांना नागपूर, लखनऊसह गोव्याला जाण्याची सोय यामुळे उपलब्‍ध झाली आहे. सध्या शहरातील चिकलठाणा विमानतळावरून नवी दिल्ली, मुंबई, अहमदाबाद, हैदराबाद, बंगळुरूसाठी विमानसेवा सुरू आहे. आता गोवा आणि नागपूरसाठीही विमानसेवा सुरू झाली आहे.

असे आहे वेळापत्रक…
लखनऊहून सकाळी ७.३० वाजता निघून नागपूरला सकाळी ९.२० वा. पोहोचेल. नागपूरहून संभाजीनगरसाठी सकाळी ९.४० वा. निघून सकाळी ११ वा. छत्रपती संभाजीनगरला पोहोचेल. छत्रपती संभाजीनगरहून सकाळी ११.३० वा. निघून गोवा येथे दुपारी १.३० वा. पोहोचणार. गोवा येथून दुपारी २.१० वाजता छत्रपती संभाजीनगरसाठी रवाना आणि दुपारी ४.१० वा. शहरात पोहोचणार. छत्रपती संभाजीनगर येथून सायं. ४.४० वा. निघून नागपूर येथे सायं. ६.१० वा. पोहोचणार. नागपूरहून रात्री ६.३० वाजता लखनऊसाठी रवाना होईल आणि रात्री ८.१५ वा. पोहोचणार.