मोठी बातमी! मंगळवारी दुपारी ४ पर्यंत मुंबईचे रस्ते रिकामे करा, मुंबई उच्च न्यायालयाचे मराठा आंदोलकांना निर्देश

मुंबई (सीएससीएन वृत्तसेवा) : मराठा आरक्षण आंदोलनावर मुंबई उच्च न्यायालयाने चिंता व्यक्त केली आहे. उच्च न्यायालयाने आज, १ सप्टेंबरला म्हटले, की मनोज जरांगे यांचे आंदोलन शांततेत नाही. त्यात सर्व अटींचे उल्लंघन करण्यात आले आहे. मुंबईत सामान्य स्थिती पूर्ववत करण्याचे आवाहन करत जरांगे आणि त्यांच्या समर्थकांना मंगळवारी दुपारपर्यंत परिस्थिती सुधारण्याची आणि सर्व रस्ते रिकामे करण्याची संधी दिली आहे.

रस्ते अडवले, शाळा बंद पडल्या...
मराठा आरक्षणाच्या मागणीसाठी मनोज जरांगे यांचे आंदोलन चौथ्या दिवशीही सुरू आहे. मुंबईचीवाहतूक व्यवस्था पूर्णपणे कोलमडली आहे. त्रास वाढल्याने मुंबई पोलिसांनी अनेक प्रमुख रस्ते बंद केले आहे. विशेषतः छत्रपती शिवाजी महाराज टर्मिनस (सीएसएमटी) च्या आसपासचे रस्ते बंद करण्यात आले. मरीन ड्राइव्ह आणि पीडी मेलो रोडवरही मोठी वाहतूक कोंडी झाली आहे. आंदोलकांनी क्रिकेट क्लब ऑफ इंडिया लिमिटेडच्या परिसरात प्रवेश करण्याचा प्रयत्न केला. या भागातही वाहतूक कोंडी झाली होती. मुंबईकरांची मोठी गैरसोय होत असून, लोकांना त्यांच्या कामावर जाण्यासाठी आणि येण्यासाठी जास्त वेळ लागत आहे. शाळा आणि महाविद्यालये देखील बंद करावी लागली आहेत.