खळबळजनक : कुख्यात गुंड मुकेश साळवेचा क्रांती चौक पोलीस ठाण्याच्या लॉकअपमध्ये राडा!

छत्रपती संभाजीनगर (सीएससीएन वृत्तसेवा) : १७ हून अधिक गुन्हे दाखल असलेल्या कुख्यात गुंड मुकेश महेंद्र साळवे (वय २८, रा. महादेव मंदिराजवळ, मुकुंदवाडी) याने क्रांती चौक पोलीस ठाण्यात शुक्रवारी (५ सप्‍टेंबर) दुपारी २ च्या सुमारास मोठाच राडा केला. लॉकअपमध्ये स्वतःचे डोके आपटून घेत, शर्टने गळफास घेत आत्‍महत्‍येचाही प्रयत्‍न केला. पोलिसांशीही झटापट केली.

पोलीस सूत्रांनी सांगितले, की जवाहरनगर पोलीस ठाण्यात दाखल गुन्ह्यातील २, सिडको एमआयडीसी पोलीस ठाण्यातील १, क्रांतीचौक येथील १, सातारा येथील २, पुंडलीकनगर येथील ४, मुकुंदवाडी येथील १, वेदांतनगर येथील १, बेगमपुरा येथील १, उस्मानपुरा येथील १ असे एकूण १४ आरोपी क्रांती चौक पोलीस ठाण्याच्या लॉकअपमध्ये ठेवले होते. लॉकअप ड्युटीवर पोलीस अंमलदार श्रीकृष्ण गाडगे होते. त्‍यांच्यासोबत पोलीस अंमलदार योगेश कुलकर्णी, केशव बारगजे, प्रमोद चव्हाण, प्रकाश पवार होते.

मुकुंदवाडी पोलिसांनी अटक केलेला मुकेश साळवे हा गाडगे यांना म्हणाला की, मला पिण्यासाठी बिडी द्या. त्यावर गाडगे यांनी त्याला सांगितले की, लॉकअपमध्ये तुला बिडी पिण्यास मनाई आहे. त्यावर मुकेशने लॉकअपच्या लोखंडी गेटसमोर ठेवलेल्या पाण्याच्या स्टीलच्या टाकीचे झाकण हातात घेऊन स्वतःच्या डोक्यावर मारून घेतले. त्यावेळी गाडगे यांनी त्याच्या हातातून स्टीलच्या टाकीचे झाकण हिसकावून घेतले. नंतर त्याने लॉकअपच्या लोखंडी गजाला डोके आदळण्याचा प्रयत्न केला. गाडगे यांनी त्याला रोखले व तशी माहिती पोलीस उपनिरीक्षक धर्मेंद्र शिंदे यांना दिली. त्यानंतर दुपारी दोनला मुकेशने लॉकअपमध्ये ठेवलेल्या इतर आरोपींसोबत वाद घालून आरडाओरड करून दंगा करत त्यांच्याशी झटापट करून त्रास दिला.

पोलिसांकडे पाहून मी स्वतःला जखमी करून घेतो व आत्महत्या करतो, अशी धमकी देऊन लॉकअपच्या आतमध्ये असलेले छोट्या भिंतीच्या बाजूस असलेल्या टॉयलेटच्या फरशीजवळ जाऊन स्वतःचा शर्ट काढून शर्टाने गळ्याला बांधून गळा आवळू लागला. त्यांनी पोलीस अंमलदार योगेश कुलकर्णी यांनी लॉकअपचा दरवाजा उघडून मुकेशने गळ्याला लावलेला शर्ट काढण्याचा प्रयत्न केला असता त्याने पोलिसांशीही झटापट केली. अधिक तपास सहायक पोलीस उपनिरीक्षक रमेश कांदे करत आहेत.

मुकेश साळवे कुख्यात गुन्हेगार...
मुकेश साळवे याच्याविरुद्ध १७ गंभीर गुन्हे दाखल आहेत. त्‍याने २ सप्‍टेंबरला सकाळी मुकुंदनगरातील बाळू मकळे (वय २८) या तरुणावर दीड फूट लांब चाकूने प्राणघातक हल्ला चढवल्याने पोलिसांनी गुन्हा दाखल करत मुकेशला अटक केली आहे. बाळू हल्ला करताना त्‍याने मी मुकुंदवाडीचा दादा... माझे कोणीच काही वाकडे करू शकत नाही, असे म्हणत धमकावले होते. विशेष म्‍हणजे, मुकेशने काही दिवसांपूर्वी एका इलेक्ट्रिशियनवर प्राणघातक हल्ला केला होता. त्याला ८ टाके पडले. मात्र, पोलिसांत तक्रार करू नये म्हणून मुकेशने त्याला रुग्णालयात जाऊन धमकावले होते. त्‍यामुळे त्याने पोलिसांत तक्रार केली नव्हती. मार्चमध्ये मुकेश साळवेसह विकी ऊर्फ हेल्मेट सोनकांबळे (वय ३३), बालाजी पिवळ (वय ३२) या टोळक्‍याने अन्य साथीदारांच्या मदतीने एका व्यापाऱ्याला खंडणी मागून प्राणघातक हल्ला केला होता. गोळीबारही केला होता. त्यांच्यावर मकोका अंतर्गत कारवाई झाली होती. मुकेश साळवे आणि त्‍याची गँग ही सोशल मीडियावर वेगवेगळ्या शस्‍त्रांसह छायाचित्रे, व्हिडीओ बनवून टाकतात. त्‍याद्वारे ते दहशत पसविण्याचा प्रयत्‍न करतात. मात्र शहराच्या सायबर पोलीस टीमचे याकडे लक्ष कसे जात नाही, असा प्रश्न नागरिकांना पडला आहे.