चौघांविरुद्धचा आत्‍महत्‍येस प्रवृत्त केल्याचा गुन्हा खंडपीठाने केला रद्द, म्हणाले, व्यवहाराच्या पैशांची मागणी करणे आत्‍महत्‍येस प्रवृत्त करणे नव्हे!

छत्रपती संभाजीनगर (सीएससीएन वृत्तसेवा) : मुंबई उच्च न्यायालयाच्या औरंगाबाद खंडपीठाच्यान्या. विभा कंकणवाडी आणि न्या. संजय देशमुख यांनी ४ जणांविरुद्धचा आत्महत्येस प्रवृत्त केल्याचा गुन्हा रद्द केला. हा निकाल देताना ‘व्यवहाराच्या पैशांची मागणी करणे म्हणजे आत्महत्येस प्रवृत्त केले असे म्हणता येणार नाही', असे निरीक्षण खंडपीठाने नोंदवले. 

ज्‍यांनी आत्‍महत्‍या केली त्‍या गजानन गोरे यांनी अनेक कंपन्यांकडून माल उचलून पैसेच दिले नव्हते. त्यामुळे पैशाच्या मागणीमुळे त्यांना आत्महत्येस प्रवृत्त केले असे म्हणता येणार नाही, असे स्‍पष्टमत खंडपीठाने व्यक्‍त केले. गोरे यांच्या पत्नी मीरा यांनी त्यांच्या पतीला आत्महत्येस प्रवृत्त केल्याची तक्रार नांदेड जिल्ह्यातील अर्धापूर पोलीस ठाण्यात केली होती. त्‍यावरून पोलिसांनी ७ जणांविरुद्ध गुन्हा दाखल केला होता. त्यांचे पती शेती संबंधित खते व औषध विक्री करणाऱ्या कंपनीत खासगी नोकरी करत होते.

त्यांनी अनेक कंपन्यांकडून माल उचलला. मात्र पैसे दिलेच नाहीत. पैसे मागायला कुणी आले, की तो माझ्याकडे पैसे नाहीत, मला टेन्शन देऊ नका, असे म्हणत होता. यातूनच त्‍याने शेतात विष पिऊन आत्महत्या केली होती. त्‍याला आत्महत्येला पोलिसांनी बबन ढाके, आकाश काळे, विशाल ठाकूर, राजेश्वर पाटील यांना जबाबदार धरले होते. गजाननने ८ ते १० व्यक्तींना विष पित असलेला फोटो पाठवून तुम्ही पैशाची मागणी करत असल्यामुळे मी आत्महत्या करत असल्याचा मेसेज केला होता. ही बाब न्यायालयासमोर अर्जदारांनी मांडली. त्यानंतर न्यायालयाने हा गुन्हाच रद्द ठरवला.