सोयगाव पोलीस ठाण्यातील लाचखोर पोलीस अंमलदार राजू बर्डे, रवींद्र तायडे ACB च्या जाळ्यात!

सोयगाव (सीएससीएन वृत्तसेवा) : सोयगाव पोलीस ठाण्याचे दोन लाचखोर पोलीस अंमलदार त्‍यांच्या २ दलालांसह लाचलुचपत प्रतिबंधक विभागाच्या (एसीबी) जाळ्यात अडकले. गुरुवारी (२८ ऑगस्ट) दुपारी ३ वाजता सोयगावातील न्यू हॉटेल मुरलीमध्ये ही कारवाई करण्यात आली. पोलीस जमादार राजू बर्डे (वय ३६), पोलीस शिपाई रवींद्र रामदास तायडे (वय ३८), दलाल सुनील मुरलीधर सोनोने (वय ५३, हॉटेलचालक) व अरविंद राठोड (वय २९, हॉटेलचालक, जरंडी) अशी लाचखोरांची नावे आहेत. तक्रार अर्जावर कोणतीही कारवाई न केल्याची बक्षिसी म्‍हणून आधी ५ हजार आणि नंतर ३ हजारांची लाच घेतली होती.

‘एसीबी’च्या सूत्रांच्या माहितीनुसार, सोयगाव पोलीस ठाण्यात एका व्यक्‍तीविरुद्ध १५ दिवसांपूर्वी तक्रार देण्यात आली होती. ही तक्रार कारवाई न करता निकाली काढण्यात आल्याबद्दल बक्षीस म्‍हणून बर्डे व तायडे यांनी त्या व्यक्‍तीला जरंडीचा हॉटेलचालक राठोड याच्यामार्फत १५ हजार रुपये मागितले. त्यापैकी ५ हजार रुपये २५ ऑगस्ट रोजी फोन पेद्वारे घेतले होते. मात्र आणखी लाच देण्याची इच्छा नसल्याने त्‍या व्यक्‍तीने छत्रपती संभाजीनगरच्या एसीबीला कळवले. एसीबीने गुरुवारी दुपारी हॉटेल न्यू मुरलीमध्ये सापळा रचला.

तडजोडीअंती तायडे याने तीन हजार रुपये घेण्याचे कबूल करून हॉटेलचा मालक सोनोनेकडे पैसे द्यायला सांगितले. त्यानुसार सोनोने याने पैसे घेतले. सापळा लावून बसलेल्या एसीबीच्या पथकाने लगेचच हल्लाबोल केला. यावेळी तायडे हॉटेलमध्येच होता. बर्डे, तायडे, सोनोनेला लगेचच अटक केली. नंतर जरंडीवरून राठोडलाही पकडून आणले. त्यांचे मोबाइलही जप्त  केले. ही कारवाई लाचलुचपत प्रतिबंधक विभागाच्या अधीक्षक माधुरी कांगणे यांच्या मार्गदर्शनाखाली पोलीस निरीक्षक योगेश शिंदे, सापळा अधिकारी वाल्मिकी कोरे, राजेंद्र जोशी, प्रकाश डोंगरदिवे, सी. एन. बागूल आदींनी केली.