जालना (विशेष प्रतिनिधी) : पोलीस घेऊन जात असलेल्या व्यक्‍तीस मागून येऊन पोलीस उप अधीक्षक अनंत कुलकर्णी हे लाथ मारत असल्याचा व्हिडीओ सोशल मीडियावर व्हायरल झाला. प्रसारमाध्यमांनीही अत्‍यंत ठळकपणे याबद्दलचे वृत्त दिले. त्‍यामुळे कुलकर्णी यांच्याबद्दल जितका रोष निर्माण करता येईल तितका काही मंडळींनी करण्याचा प्रयत्‍न केला. पण नक्की घडलं काय होतं, कशामुळे हा सगळा उद्वेग कुलकर्णी यांच्याकडून व्यक्‍त झाला, यामागचं चित्र पडद्यामागेच राहिलं आहे... त्‍याआधी बरंच काही घडलं होतं, जे समजून घेतल्यानंतर, कुलकर्णी यांनी जे केलं, कुणीही तेच केलं असतं, हेच समोर येतं... विशेष वृत्तांत...
आधी प्रकरण समजून घेऊ, गोपाळ चौधरी याचे ७ ते ८ वर्षांपूर्वी लग्‍न झाले असून, त्‍याची सासरवाडी खामगाव आहे. पती-पत्‍नीत पटत नसल्याने ती माहेरी निघून गेली. त्‍यानंतर अनेक दिवस वाट पाहून तिच्या घरच्यांनी तिचे लग्‍न दुसरीकडे लावून दिले. त्‍यानंतर ती लग्‍नच कसे करू शकते, याचा जाब विचारायला म्हणून गोपाळ चौधरी आणि त्‍याचे कुटुंबीय खामगावला गेले असता पत्‍नीच्या माहेरच्यांसोबत त्‍यांची हाणामारी झाली. जालन्याला परतल्यानंतर त्‍यांनी जालना पोलिसांकडे खामगावला घडलेल्या घटनेची तक्रार नोंदविण्याचा प्रयत्‍न केला. पोलिसांनी गुन्हा दाखल करून घटनास्‍थळ खामगाव असल्याने तो गुन्हा तिकडे वर्ग केला. मात्र त्‍यानंतर खामगावमध्ये कारवाई होत नाही म्हणून गोपाळ चौधरी आणि त्‍याचे कुटुंबीय हे जालन्यात आंदोलन करत असतात.
१५ ऑगस्ट, २६ जानेवारी तोंडावर आला, की त्‍यांचे आंदोलन सुरू होते. राष्ट्रीय उत्‍सवात तणाव नको म्हणून वैतागलेल्या जालना पोलिसांनी मग त्‍याला स्थानबद्ध करून ठेवायला सुरुवात केली. यंदाही १५ ऑगस्टच्या पार्श्वभूमीवर त्‍याला स्थानबद्ध करून ठेवलं होतं. पण पोलीस ठाण्यात पोलीस उपनिरीक्षक दर्जाच्या अधिकाऱ्यासोबत झटापट करून तो जालना जिल्हाधिकारी कार्यालयासमोर आंदोलनासाठी आला. कुलकर्णी हे चौधरी यांना पार्श्वभागावर लाथा घालतानाचा व्हिडीओ सर्वांसमोर आला, पण त्‍याआधी जे घडलं ते कुठेही समोर आणण्यात का आलं नाही, याबद्दल आश्चर्य आहे. ध्वजवंदनाच्या सोहळ्यात विघ्न नको म्हणून पोलीस अधिकारी, अंमलदार, महिला पोलीस अंमलदार हे सर्वजण चौधरी आणि त्‍याच्या वडिलांना समजावत होते. तो त्‍यांना खालच्या स्तरावर अश्लील शिवीगाळ करत होता. पेटवून घेणार, अशी धमकी देत होता. पोलिसांची आई-बहीण काढताना त्‍यांच्या पार्श्वभागाचा उल्लेख करणाऱ्या चौधरीच्या पार्श्वभागावर बंदोबस्तात वैतागलेल्या कुलकर्णी यांनी लाथ मारली... हीच एकमेव या कहानीची दुसरी बाजू आहे. जी समोर आणलेलीच नाही. केवळ पोलिसांप्रती असलेला राग या घटनेच्या निमित्ताने बाहेर काढण्यातच शहाणपण समजल्याचे दिसून येत आहे.
कोण आहेत कुलकर्णी?पोलीस उपअधीक्षक कुलकर्णी यांची पोलीस दलात ३२ वर्षे सेवा झाली आहे. ते आजवर कोणत्‍याही वादात सापडलेले नाहीत. राष्ट्रपती पदकप्राप्त अधिकारी आहेत. नक्षलग्रस्त भागात त्‍यांनी बजावलेल्या कामगिरीचा उल्लेख आजही अभिमानाने होतो. क्लिष्ट गुन्ह्यांची उकल करण्यात त्‍यांचा हात कुणीही धरू शकत नाही. तीन कोटी रुपयांचा दरोड्याचा गुन्हा त्‍यांनी ज्‍या पद्धतीने उघडकीस आणला, ते पोलीस दलासाठी उदाहरण बनले आहे. अवैध धंद्यांवर ते सातत्‍याने करत असलेल्या कारवायामुळे ते चर्चेत असतात. बावणे पांगरी येथे घडलेला दलित- सवर्ण संघर्ष त्‍यांनी ज्‍या सामोपचाराने सोडवला, त्‍याचेही कौतुक झाले होते. जमिनीची विभागणी करून बौद्ध विहाराला त्‍यांनी जागा मिळवून दिली होती.
.jpg)
