शासकीय अधिकाऱ्याला भामट्याने असा लावला चुना!; तुम्‍हीही अलर्ट राहा..., शहागंजमध्ये घडली ही घटना 

छत्रपती संभाजीनगर (सीएससीएन वृत्तसेवा) : भामट्याने हातचलाखीने एटीएम कार्ड गायब करत शासकीय अधिकाऱ्याच्या बँक खात्‍यातून ४० हजार रुपये काढून घेतले. सिटी चौक पोलिसांनी या भामट्याविरुद्ध मंगळवारी (१९ ऑगस्ट) गुन्हा दाखल केला आहे.

सय्यद सलीम अत्ताउल्ला (वय ५४, रा. कटकटगेट बाबर कॉलनी माशाल्ला हॉलसमोर, ह. मु. पिर बुऱ्हान कॉलनी, नांदेड) यांनी या प्रकरणात तक्रार दिली आहे. ते मुदखेडच्या भूमीअभिलेख कार्यालयात अधिकारी आहेत. नोकरीनिमित्त नांदेडला पत्नीसह राहतात. मुले शिक्षणामुळे छत्रपती संभाजीनगरला राहतात. अत्ताउल्ला हे वैद्यकीय रजा घेऊन छत्रपती संभाजीनगरला १५ ऑगस्टपासून आले होते. मंगळवारी (१९ ऑगस्ट) दुपारी सव्वाला ते शहांगज येथील एसबीआयच्या एटीएम केंद्रात एटीएमचा पिन बदलण्यासाठी गेले होते. प्रक्रिया करत असतानाच त्यांच्यामागे लगेच एक अनोळखी व्यक्‍ती येऊन उभा राहिला. त्‍याने प्रक्रियाही सांगितली. पिन बदलल्यानंतर त्‍याने तुमचे बॅलेन्स चेक करा, तुमचा पिन व्यवस्थित सेट झाला का ते पाहून घ्या, असे म्हटले आहे.

त्‍यामुळे अत्ताउल्ला यांनी कार्ड टाकले असता तो म्हणाला, की तुम्‍ही कार्ड उलटे टाकले. ते बरोबर टाका, असे म्‍हणून त्‍याने एटीएम कार्ड मशिनमधून काढले. नकळत त्याच्याकडील एटीएम कार्ड टाकले व अत्ताउल्ला यांचे एटीएम कार्ड हातात ठेवले व लगेच तेथून निघून गेला. अत्ताउल्ला हे एटीएममध्ये बॅलेन्स चेक करत थोडा वेळ थांबले. मात्र एटीएममधून कसलाच प्रतिसाद न आल्याने त्‍यांनी घाईघाईने मशीनमधील एटीएम कार्ड काढून घेतले. जवळच्या एसबीआय बँकेत मॅनेजरकडे चौकशी केली. त्‍यांनी कार्ड दाखवायला सांगितले. ते कार्ड पाहून मॅनेजर म्हणाले, की हे कार्ड तुमचे नाही. अत्ताउल्ला यांनी कार्ड पाहिले तर ते कार्ड जयकुमार पाइकराव नावाचे असल्याचे लक्षात आले. अत्ताउल्ला हे बँकेत असतानाच त्‍यांच्या खात्‍यातून एटीएम कार्डच्या साह्याने ४० हजार रुपये काढल्‍याचा मेसेज आला. अधिक तपास पोलीस निरीक्षक निर्मला परदेशी करत आहेत.