SHOCKING : ४ जणांनी आत्‍मघाताचा निर्णय घेतल्याने छत्रपती संभाजीनगर हादरले!, देवळाई, सातारा, हर्सूल, गोलवाडीत काय घडलं...

छत्रपती संभाजीनगर (सीएससीएन वृत्तसेवा) : छत्रपती संभाजीनगरात २४ तासांतच तब्‍बल ४ जणांनी आत्‍महत्‍या केल्याने खळबळ उडाली आहे. या घटना देवळाई, सातारा, जहांगीर कॉलनीसह गोलवाडी परिसरात घडल्या. त्‍यांच्या आत्‍महत्‍येचे कारण अद्याप समोर आलेले नाही.

जिल्हा सत्र न्यायालयातील लिपिक रवींद्र बारकू कापडणीस (वय ५०) यांनी साताऱ्यातील संत रोहिदासनगर येथील राहत्‍या घरात गळफास घेतला. सोमवारी रात्री पत्‍नीला मुलांचा अभ्यास घेण्यास सांगून ते झोपायला गेले होते. मंगळवारी सकाळी बराच वेळ होऊनही ते रूमबाहेर न आल्याने पत्नीने जाऊन पाहिले असता ते गळफास घेतलेल्या अवस्थेत दिसले. त्यांच्या पश्चात एक मुलगा, एक मुलगी, पत्नी असा परिवार आहे. सातारा पोलिसांनी घटनेची नोंद घेतली असून, सहायक फौजदार रज्जाक शेख अधिक तपास करत आहेत.

गोलवाडीत युवा शेतकऱ्याची आत्‍महत्‍या
गोलवाडी येथे शेतकरी अजय तुळजाराम सलामपुरे (वय ३०) यांनी गळफास घेऊन मंगळवारी (१९ ऑगस्ट) सकाळी आत्‍महत्‍या केली. अजय यंनी नेहमीप्रमाणे कुटुंबासोबत चहा घेतला. नंतर वरच्या मजल्यावर जाऊन गळफास घेतला. त्यांच्या पश्चात आई, वडील, भाऊ, पत्नी असा परिवार आहे. अजय यांच्या आत्‍महत्‍येचे कारण छावणी पोलीस शोधत आहेत.

देवळाईच्या प्लंबरची आत्‍महत्‍या
देवळाई येथील प्लंबर ३३ वर्षीय अमोल काकासाहेब लोखंडे यांनी कामावर जात असल्याचे सांगून बाळापूर शिवारात येत एका झाडाला गळफास घेतला. मंगळवारी सकाळी ही घटना समोर आली. अमोल यांच्या पश्चात आई, वडील, पत्नी असा परिवार आहे. चिकलठाणा पोलिसांनी घटनास्‍थळी धाव घेऊन पंचनामा केला. अधिक तपास पोलीस अंमलदार निवृत्ती मदने करत आहेत.

भावाला कॉल अन्‌ तणावातून हर्सूलमध्ये चालकाची आत्‍महत्‍या
जहांगीर कॉलनीत चालक तय्यब समद पठाण (वय २४) यांनी गळफास घेऊन आत्‍महत्‍या केली. ते खासगी वाहन चालवून कुटुंबाचा उदरनिर्वाह करत होते. पत्‍नीसोबत राहत होते. याच भागात त्‍यांची सासरवाडीही आहे. काही दिवसांपासून ते तणावात होते. याच तणावातून त्‍यांनी सोमवारी रात्री दहाला भावाला कॉल केला. भाऊ त्यांच्या घरी पोहोचेपर्यंत त्‍यांनी गळफास घेतला होता. हर्सूल पोलिसांनी घटनास्‍थळी धाव घेऊन पंचनामा केला. ते कोणत्‍या कारणास्तव तणावात होते, याचा तपास केला जात आहे.