एमआयएमची थेट सोमय्यांना भिडण्याची तयारी!; सिटी चौक पोलीस ठाण्यात सोमय्या येताच एमआयएमचे पदाधिकारी जमले, पुढे काय घडलं...

छत्रपती संभाजीनगर (सीएससीएन वृत्तसेवा) : भाजप नेते किरीट सोमय्यांना थेट भिडण्याची तयारी एमआयएमच्या पदाधिकाऱ्यांनी मंगळवारी (१९ ऑगस्ट) केली होती. सोमय्यांना गाठून त्‍यांना प्रश्न विचारायचे होते. मात्र परिस्थिती चिघळत असल्याचे पाहून पोलिसांनी एमआयएम पदाधिकाऱ्यांना ताब्‍यात घेतले आणि सोमय्या निघून गेल्यानंतर सोडून दिले. या प्रकारामुळे काही काळ पोलीसही तणावाखाली आले होते. सिटी चौक पोलीस ठाण्यात सोमय्या आले असता हा धक्कादायक प्रकार घडला.

छत्रपती संभाजीनगर जिल्ह्यात २०० पेक्षा जास्त बोगस जन्म प्रमाणपत्र वाटप झाल्याचा आरोप सोमय्या यांनी जिल्हाधिकारी दिलीप स्वामी यांची भेट घेतल्यानंतर पत्रकारांशी बोलताना केला. चौकशीची मागणीही त्यांनी केली. महिनाभरात दुसऱ्यांदा सोमय्या प्रशासनाच्या भेटीला आले होते. महापालिका निवडणूक तोंडावर आल्याने बांगलादेशी घुसखोर या निवडणुकीवर परिणाम करण्याची शक्‍यता नाकारता येत नाही. त्‍यामुळे भाजप अलर्ट झाल्याचे दिसून येत आहे.

दरम्‍यान, सोमय्यांनी पोलीस आयुक्त प्रवीण पवार यांचीही भेट घेतली. त्यानंतर ते बांगलादेशी घुसखोर आणि मशिदीवरील भोंग्यांविषयी कारवाईची माहिती घेण्यासाठी सिटी चौक पोलीस ठाण्यात आले होते. ही माहिती कळताच एमआयएमचे नासेर सिद्दीकी, हाजी इसाक यांच्यासह अन्य पदाधिकारी सिटी चौक पोलीस ठाण्यात आले. त्‍यांनी अर्धा तास सोमय्या पोलीस ठाण्याबाहेर येण्याची वाट पाहिली. अखेर पोलिसांनी त्‍यांना ताब्‍यात घेतले आणि सोमय्या निघून गेल्यानंतर सोडून दिले. नासेर सिद्दीकी म्हणाले, की पोलीस सोमय्यांना संरक्षण देत आहेत. सोमय्या हे खोटे आरोप करून मुस्लिम समाजाला बदनाम करत आहेत. आम्हाला सोमय्यांना प्रश्न विचारायचे होते. या वेळी एमआयएमच्या पदाधिकाऱ्यांनी सोमय्यांविरुद्ध आक्षेपार्ह घोषणाबाजीही केली.