मुख्यमंत्री, उपमुख्यमंत्री न आल्याने अधिकाऱ्यांनीच उरकले जलपूजन, अधिकृत लोकार्पण सोहळा लवकरच : मनपा आयुक्‍त, शहराला वाढीव योजनेचे पाणी येणे सुरू...

छत्रपती संभाजीनगर (सीएससीएन वृत्तसेवा) : मुंबईतील पावसामुळे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी छत्रपती संभाजीनगरचा दौरा रद्द केला. त्‍यामुळे वाढीव पाणीपुरवठा योजनेचा लोकार्पण सोहळा घेण्याऐवजी फारोळा येथील जलशुद्धीकरण केंद्रात अधिकाऱ्यांनीच जलपूजन केले आणि लगेचच शहराला या योजनेचे पाणी मिळायला सुरुवात झाली आहे. या योजनेचे अधिकृत लोकार्पण लवकरच होईल, असे महापालिका प्रशासक जी. श्रीकांत म्हणाले. शहराला २६ एमएलडी पाणी जास्त मिळणार असल्याने रोज आता १७५ एमएलडी पाणी शहराला मिळेल. त्‍यामुळे पाणीपुरवठ्याचा टप्पा एक ते दोन दिवसांनी कमी होईल, अशी शक्‍यता वर्तवली जात आहे. सध्या शहराला आठ ते दहा दिवसांनी तर कुठे १५ दिवसांनी पाणीपुरवठा होत आहे. तो आता किती दिवसांवर येईल, याबद्दलची आशा नागरिकांना लागली आहे.

जलपूजनाच्या प्रशासकीय कार्यक्रमाला महाराष्ट्र जीवन प्राधिकरणाचे सदस्य सचिव अमगोथू श्री रंगनायक, मुख्य अभियंता मनिषा पलांडे, जीव्हीपीआर कंत्राटदार कंपनीचे शिवा रेड्डी, श्रीहरी कन्‍स्‍ट्रक्‍शनचे सचिन मुळे, महापालिकेचे अधिकारी, कर्मचारी उपस्थित होते. आधी मुख्यमंत्री येणार असल्याने महापालिका आणि महाराष्ट्र जीवन प्राधिकरणाने लोकार्पण सोहळ्याची जय्यत तयारी केली होती. त्‍यामुळे तो खर्च पाण्यात गेला आहे. वर्षभर ही योजना आधीच उशीराने सेवेत आली आहे. तिच्यात सातत्य राहावे, अशीच अपेक्षा व्यक्‍त केली जात आहे.

ऑक्‍टोबर नवीन पाणीपुरवठा योजनाही कार्यान्वित करण्याचा दावा
नवीन पाणीपुरवठा योजनेचे कामही सध्या युद्धपातळीवर सुरू आहे. ऑक्‍टोबरपर्यंत नवी योजना कार्यान्वित होईल, असा दावा केला जात आहे. मात्र एकूणच प्रशासकीय कार्यपद्धती आणि योजनेत येणाऱ्या अडचणी पाहता नव्या योजनेचे पाणी नव्या वर्षात मिळेल की ऑक्‍टोबरपर्यंत हे पाहणे उत्‍सुकतेचे ठरणार आहे. महापालिकेच्या आयुक्‍तांनी सांगितले, की नवी योजना सुरू झाली की शहरात तब्‍बल ३७१ एमएलडी पाणी दाखल होईल. त्‍यानंतर अगदी नव्या वसाहतींमध्येही पाणीपुरवठा केला जाईल. सातारा देवळाई, पैठण रोडवरील महापालिकेच्या हद्दीपर्यंतचा रहिवासी भाग, पडेगाव रोड, हर्सूल भागातील नवीन वसाहती, जटवाडा रोडवरील अंबर हिलपर्यंत, मकबरामागील गोगाबाबा टेकडीपर्यंत, चिकलठाणा परिसरातील नवीन वसाहतींनाही पाणी मिळेल, असा दावा महापालिकेकडून केला जात आहे.