४८ वर्षीय व्यावसायिकाचा २३ वर्षीय तरुणीवर लग्‍नाच्या आमिषाने वर्षभर लैंगिक अत्‍याचार, गडचिरोलीची घटना

गडचिरोली (सीएससीएन वृत्तसेवा) : तरुणीला प्रेमाच्या जाळ्यात ओढल्‍यानंतर लग्नाचे आमिष दाखवून शारीरिक संबंध ठेवले. या संबंधांची छायाचित्रे मोबाइलमध्ये काढली आणि नंतर त्‍याआधारे ब्लॅकमेल करून वारंवार शारीरिक संबंध ठेवत राहिला. अखेर वैतागलेल्या तरुणीने पोलिसांत धाव घेऊन तक्रार दिली. त्‍यावरून पोलिसांनी गडचिरोलीच्या देसाईगंज येथील सराफा व्यावसायिक व त्याच्या मित्राला रविवारी (१७ ऑगस्ट) अटक केली आहे.

सराफा व्यावसायिक सुनील पुंडलिक बोके (वय ४८, रा. गांधी वॉर्ड, देसाईगंज), त्‍याचा मित्र अक्षय कुंदनवार (वय ३२, रा. मधुबन कॉलनी, देसाईगंज) अशी अटक केलेल्यांची नावे आहेत. २३ वर्षीय तरुणीने दिलेल्या तक्रारीनुसार, सुनील बोके याने ऑगस्ट २०२४ ते २६ जून २०२५ या लग्नाचे आमिष दाखविले. अश्लील फोटो व्हायरलची धमकी देत तिच्यावर स्वतःच्या घरी व कारमध्ये वारंवार बलात्‍कार केला. त्याचा विश्वासू सहकारी अक्षय कुंदनवार याने तरुणीला बोके याला भेटण्याकरिता वारंवार फोन केला.

सतत पाठलाग करून हालचालींवर लक्ष ठेवत होता. देसाईगंज पोलिसांनी १७ ऑगस्टला सुनील बोकेच्या नागपुरात मुसक्या आवळल्या, तर अक्षय कुंदनवार यास देसाईगंजातूनच उचलले. दोघांनाही न्यायालयात हजर केले असता १९ ऑगस्टपर्यंत पोलिस कोठडीत ठेवण्याचे आदेश दिले, अशी माहिती पो.नि. अजय जगताप यांनी दिली. सूत्रांच्या माहितीनुसार, तरुणी पोलिसांत तक्रार करणार असल्याची भनक लागताच शहरातील राष्ट्रीय पक्षाच्या एका कथित वादग्रस्त नेत्याने पोलिसांवर दबावतंत्र वापरले. मात्र तरुणीने ठाम राहून तक्रार दिली व पोलिसांनीही तिला धीर दिल्याने नेत्‍याचा प्रयत्‍न अयशस्वी ठरला.