‘पदवीधर'साठी शिंदे गटानेही ठोकला शड्डू!; शिरसाट कार्यकर्त्यांना म्हणाले, ‘युती’चे नंतर बघू, लढण्याची ताकद ठेवा!, अजित पवार गटाला धडकी

By City News Desk

On 26 Oct 2025

‘पदवीधर'साठी शिंदे गटानेही ठोकला शड्डू!; शिरसाट कार्यकर्त्यांना म्हणाले, ‘युती’चे नंतर बघू, लढण्याची ताकद ठेवा!, अजित पवार गटाला धडकी

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : महानगरपालिका, नगरपालिका, जिल्हा परिषद, पंचायत समित्यांच्या निवडणुकांत महायुतीतील तिन्ही पक्ष वेगवेगळे लढण्याचे संकेत मिळत आहेत. त्यातच आता मराठवाडा पदवीधर मतदारसंघाच्या निवडणुकीतही शिंदे गटाने स्वतंत्र लढण्याची तयारी केल्याचे दिसत आहे. खुद्द छत्रपती संभाजीनगरचे पालकमंत्री संजय शिरसाट यांनीच तसे संकेत दिले असून, पदवीधर मतदारसंघाची निवडणूक लढण्याची ताकद दाखवून द्या, असे आवाहनच त्यांनी कार्यकर्त्यांना केले आहे. शिरसाट यांच्या या वक्तव्याकडे अजित पवार यांच्या राष्ट्रवादी काँग्रेसला इशारा म्हणून पाहिले जात आहे.

शिंदे गटाची बैठक शनिवारी (२५ ऑक्टोबर) निराला बाजार येथील मध्यवर्ती कार्यालयात बैठक पार पडली. या वेळी शिरसाट म्हणाले, की मराठवाडा पदवीधर मतदारसंघाच्या निवडणुकीत युती होणार की नाही हे नंतर बघू. पण कार्यकर्त्यांनी आपल्याला ही निवडणूक स्वतंत्रपणे लढवायची आहे अशी तयारी करून ठेवायला हवी. कोणत्याही परिस्थितीत ही निवडणूक लढवून आपला उमेदवार निवडून आणायचा, अशी ताकद आपल्याला दाखवून द्यायची आहे. यासाठी सर्वांनीच जास्तीत जास्त मतदार नोंदणीवर भर द्यावा. कुणी बोगस मतदारांची नोंदणी करणार नाही याकडेही लक्ष देण्याची गरज आहे. या वेळी खा. संदीपान भुमरे, आ. प्रदीप जयस्वाल, जिल्हाप्रमुख राजेंद्र जंजाळ यांनीही मार्गदर्शन केले. माजी आमदार कैलास पाटील, माजी महापौर नंदकुमार घोडेले, विकास जैन, संजय तायडे पाटील, विश्वनाथ राजपूत, शिल्पाराणी वाडकर, शेखर जाधव आदींची व्यासपीठावर उपस्थिती होती.