छत्रपती संभाजीनगर (मेट्रोपोलिस पोस्ट वृत्तसेवा) : कांचनवाडीतील कश्मिरनगरात हातात तलवार घेऊन दहशत माजवणाऱ्या युवकाच्या मुसक्या सातारा पोलिसांनी आवळल्या. त्याच्याकडील चौकशीत त्याच्याकडे गांजाचा साठा असल्याचेही समोर आले. पोलिसांनी सव्वा किलो गांजा जप्त केला. ही कारवाई सोमवारी (१६ मार्च) करण्यात आली.
सोनूसिंग दीपकसिंग भोंड (वय ३०, रा. कांचनवाडी स्मशानभूमी, कश्मिरनगर) असे पकडण्यात आलेल्या संशयिताचे नाव आहे. त्याच्याविरुद्ध पोलीस उपनिरीक्षक गोविंद एकीलवाले, पोलीस अंमलदार सुरेश काळे यांनी दिलेल्या तक्रारींवरून दोन वेगवेगळे गुन्हे सातारा पोलीस ठाण्यात गुन्हा दाखल करण्यात आले आहेत. सातारा पोलिसांचे पथक फरारी असलेल्या गुन्हेगारांचा शोध घेत होते. कांचनवाडीतील कश्मिरनगरात सोनूसिंग हातात धारदार तलवार घेऊन दहशत माजवत असल्याची माहिती वरिष्ठ पोलीस निरीक्षक कृष्णा शिंदे यांना मिळाली. त्यांनी सहकाऱ्यांसह तिथे जाऊन सोनूसिंगला ताब्यात घेतले. त्याच्याकडे एक तलवार व मोबाइल मिळून आला.
पोलिसांनी त्याची कसून चौकशी केली असता त्याच्याकडील मोबाइलमधील व्हॉट्स अॅप चॅटींगमध्ये गांजा खरेदी केल्याचे समोर आले. त्याने गांजा त्याच्या घरामागील बकऱ्यांच्या गोठ्यात ठेवलेला असल्याचे सांगितले. पोलिसांनी तिथे जाऊन १ किलो २०९ ग्रॅम गांजा (किंमत २४ हजार १८० रुपये) जप्त केला. ही कारवाई पोलीस आयुक्त प्रवीण पवार, पोलीस उपायुक्त प्रशांत स्वामी, सहायक पोलीस आयुक्त मनिष कल्याणकर यांच्या मार्गदर्शनाखाली वरिष्ठ पोलीस निरीक्षक कृष्णा शिंदे, सहायक पोलीस निरीक्षक शैलेश देशमुख, पोलीस उपनिरीक्षक गोविंद एकीलवाले, दिलीप बचाटे, नंदकुमार भंडारे, पोलीस अंमलदार दिगंबर राठोड, सुनिल बेलकर, सचिन काळे, सुरेश काळे, कल्याण निकम, विशाखा तुपे, गिता ढाकणे यांनी पार पाडली.
.jpg)
.jpg)
