माजी आमदार हर्षवर्धन जाधव यांना कारावासाची शिक्षा, पोलीस निरीक्षकाच्या गालात मारल्याचे प्रकरण

नागपूर/छत्रपती संभाजीनगर (सीएससीएन वृत्तसेवा) : कन्नडचे माजी आमदार हर्षवर्धन रायभान जाधव यांना बुधवारी (६ ऑगस्ट) नागपूर सत्र न्यायालयाने एक वर्ष कारावासाची शिक्षा सुनावली. एकूण २० हजार रुपयांचा दंडही ठोठावला. न्यायाधीश आर. जे. राय यांनी हा निकाल दिला. जाधव यांनी उद्धव ठाकरे यांच्या सुरक्षा ताफ्यामधील पोलीस निरीक्षकाच्या कानशिलात लगावली होती. त्‍यामुळे त्‍यांच्यावर हा खटला चालला.

सरकारच्या वतीने ॲड. चारुशीला पौनिकर यांनी बाजू मांडली. भादंवि कलम ३५३ (सरकारी कामात अडथळा आणणे) अंतर्गत एक वर्ष कारावास व दहा हजार तीन महिने अतिरिक्त कारावास. रुपये दंड आणि दंड न भरल्यास तीन महिने अतिरिक्‍त कारावास, भादंवि कलम ३३२ (सरकारी कर्मचाऱ्याला दुखापत करणे) अंतर्गत एक वर्ष कारावास व दहा हजार रुपये दंड आणि दंड न भरल्यास तीन महिने अतिरिक्त कारावासाची शिक्षा जाधव यांना सुनावण्यात आली आहे.

काय आहे प्रकरण…
१७ डिसेंबर २०१४ ला हिवाळी अधिवेशनादरम्यान शिवसेना पक्षप्रमुख उद्धव ठाकरे यांची हॉटेल प्राइडमध्ये ज्येष्ठ नेत्यांसोबत बैठक सुरू होती. तिथे कुणालाही येऊ न देण्याचे आदेश होते. हर्षवर्धन जाधव तिथे आले. त्यांना आतमध्ये जाण्यास सुरक्षेसाठी तैनात विशेष सुरक्षा पथकाचे पोलीस निरीक्षक पराग जाधव यांनी मनाई केली. बैठकीत जाण्यासाठी दिवाकर रावते व एकनाथ शिंदे आले. त्यांना नेण्यासाठी बैठकीतून रामदास कदम आले. त्यांनी दोघांनाही बैठकीला नेले. मात्र हर्षवर्धन जाधव यांना नेले नाही. हर्षवर्धन जाधव यांना मनाई करण्यात आल्याने त्यांनी आरडा-ओरड करीत आत जाण्याचा प्रयत्न केला. तरीही पराग जाधव यांनी आत सोडले नाही. याचवेळी आरडाओरड करून हर्षवर्धन जाधव यांनी पराग जाधव यांच्या कानशिलात लगावली. त्यानंतर ते तेथून बेपत्ता झाले होते. पराग जाधव यांनी सोनेगाव पोलिसांत केलेल्या तक्रारीवरून हर्षवर्धन जाधव यांच्याविरुद्ध गुन्हा दाखल करण्यात आला होता.