उत्तराखंडमध्ये अडकले छत्रपती संभाजीनगरचे १८ पर्यटक भाविक, सर्वजण सुखरुप

छत्रपती संभाजीनगर (सीएससीएन वृत्तसेवा) : उत्तराखंड राज्यातील धराली (जिल्हा उत्तरकाशी) परिसरात मुसळधार पाऊस व ढगफुटी झाल्याने खीरगंगा नदीला मोठा पूर येऊन मोठा विध्वंस घडला आहे. अनेक पर्यटक अडकून पडले आहेत. यात छत्रपती संभाजीनगरच्या १८ पर्यटक भाविकांचा समावेश आहे. ते सर्व सुखरूप असल्याची माहिती राज्य आपत्कालीन कार्य केंद्राकडून देण्यात आली आहे.

आवश्यक मदत करण्यासाठी महाराष्ट्र शासन पर्यटकांशी संपर्क करत आहे. यासाठी राज्य शासनामार्फत उत्तराखंड आपत्ती व्यवस्थापन केंद्र व उत्तरकाशी जिल्हा आपत्ती केंद्राशी संपर्क साधला जात असून अडकलेल्या पर्यटकांना सुरक्षितस्थळी हलविण्यासाठी महाराष्ट्र सदन, दिल्ली यांच्या माध्यमातून प्रयत्न सुरू आहेत. आवश्यकतेनुसार जिल्हा प्रशासनालाही सूचनाही देण्यात आल्या आहेत. छत्रपती संभाजीनगर येथील १८ यात्रेकरू ३१ जुलैला केदारनाथ यात्रेला गेले होते. ते ४ ऑगस्टला उत्तरकाशी येथे पोहोचले.

मंगळवारी (५ ऑगस्ट) धराली येथे ढगफुटी झाली तेव्हा सर्व पर्यटक भाविक तिथून १७ कि.मी.अंतरावरील भैरव घाटी पाहण्यासाठी गेले होते. सर्वजण सुखरूप असल्याची माहिती प्राप्त झाली आहे. या यात्रेकरूंमध्ये शिवाजी दहिवाळ, शुभांगी शहाणे, किरण शहाणे, मंजू नागरे, उज्ज्वला बोर्डे, अरुण बोर्डे, ज्योती बोर्डे, भारती कुपटकर, प्रमिला दहिवाळ, संतोष कुपटकर, नुतन कुपटकर, शिवदत्त शहाणे, उषा नागरे, कल्पना बनसोड, नवज्योत थोरहत्ते, वेदांत थोरहत्ते, श्रीकृष्ण थोरहत्ते, शितल थोरहत्ते, नूतन (पूर्ण नाव माहीत नाही) यांचा समावेश आहे.
संपर्क क्रमांक
राज्य आपत्कालीन कार्य केंद्र, महाराष्ट्र : ९३२१५८७१४३ / ०२२-२२०२७९९० / ०२२-२२७९४२२९
राज्य आपत्कालीन कार्य केंद्र, उत्तराखंड : ०१३५-२७१०३३४ / ८२१