छत्रपती संभाजीनगर (सीएससीएन वृत्तसेवा) : गणेश संपत म्हस्के (वय ३०, रा. आंबेडकरनगर, छत्रपती संभाजीनगर) या चालकाने स्‍कूलबसमध्ये ९ वर्षीय चिमुकलीसोबत अश्लील कृत्य केल्याची संतापजनक घटना मुकुंदवाडी पोलीस ठाण्याच्या हद्दीत समोर आली असतानाच, तशाच स्वरुपाची आणखी एक घटना सिडको पोलीस ठाण्याच्या हद्दीत समोर आल्याने खळबळ उडाली आहे. ही घटना टीव्ही सेंटर भागात ३० जुलैला दुपारी ३ च्या सुमारास घडली असून, आता उजेडात आली आहे.
सिडको पोलिसांनी रिक्षाचालक संतोष मधुकर ठाकरे (वय ४६, रा. एन-१३) याला अटक केली असून, त्याची रिक्षा जप्त करण्यात आली आहे. सूत्रांच्या माहितीनुसार, आठवीत शिकणारी १३ वर्षीय अनन्या (नाव बदलले आहे) टीव्ही सेंटर भागातील एका इंग्रजी माध्यमाच्या शाळेत शिकते. अनन्या शाळेत रिक्षाने ये-जा करते. शाळा सुटल्यावर क्लासेसला ती जाते. तिथून पालक स्वतः घेऊन येतात. ३० जुलैला रिक्षाचालक संतोषने तिच्या वडिलांना कॉल करून तिला मी घेऊन येतो, असे सांगितले. नेहमीचाच चालक असल्याने त्‍यांनीही होकार दिला. क्‍लासेसमधून तिला घेतल्यानंतर संतोषने एम-२ मार्गे घरी नेताना मध्येच निर्मनुष्य ठिकाणी रिक्षा थांबवली. तो मागच्या सीटवर मुलीच्या बाजूला आला.
त्याने अश्लील कृत्य करायला सुरुवात केली. त्‍यामुळे अनन्या घाबरून गेली. तिने मी माझ्या पप्पांना सांगेन, असे काही करू नका, असे त्याला सांगितल्यावर संतोष बिथरला. त्याने तिला घरी आणून सोडले. नेहमी उत्‍साही अनन्या एकदम घाबरलेली दिसल्याने तिच्या आईने विश्वासात घेऊन तिला विचारणा केली असता तिने घडलेला प्रकार सांगितला. तिच्या आई-वडिलांनी संतोषला कॉल करून उद्यापासून अनन्या रिक्षातून येणार नाही, असे सांगितले. त्‍यानंतर सिडको पोलीस ठाण्यात तक्रार दिली. सिडको पोलीस निरीक्षक कुंदनकुमार वाघमारे यांच्या आदेशानुसार, पोलीस उपनिरीक्षक हरिदास मैंदाड यांनी संतोषला त्याच्या घरातून अटक केली.
संतोषचा सिडको एन १३ मध्ये फ्लॅट आहे. तो विवाहित असून, त्याला दोन मुली आहेत. पोलिसांनी कसून चौकशी केली तेव्हा त्याने माझ्याकडून स्पर्श केला गेला, अशी कबुली दिली. तो १५ वर्षांपासून तीन शाळांसाठी विद्यार्थ्यांची ने-आण करतो. त्‍यामुळे त्याने यापूर्वीही काही मुलींचा अशाप्रकारे लैंगिक छळ केला का, याबद्दल संशय निर्माण झाला आहे. पोलिसांनी त्याच्या मालकीची रिक्षा जप्त केली असून, त्याचा परवाना रद्द करण्यासाठी कारवाई करणार असल्याचे पोलीस उपनिरीक्षक मैंदाड यांनी सांगितले. या घटनेमुळे मुलगी बिथरली असून, शाळा व्यवस्थापनही हादरून गेले आहे. शाळेत तातडीने पालक, स्कूलबस, व्हॅन व रिक्षाचालकांची बैठक घेण्यात आली. त्यात सर्व चालकांना सूचना करण्यात आल्या.
...तर शाळांविरुद्ध पोलीस कारवाई होणार
मुकुंदवाडी पोलीस ठाण्याच्या हद्दीत ९ वर्षीय विद्यार्थिनीसोबत घडलेल्या घटनेची पोलीस आयुक्‍त प्रवीण पवार यांनी गंभीर दखल घेतली. त्‍यांनी यापुढे अशा घटनांत शाळा व्यवस्थापनाचा निष्काळजीपणा आढळला तर त्यांच्यावरही कठोर कारवाई करण्याचा इशारा दिला आहे. मुकुंदवाडीतील गुन्ह्यासोबत शाळेचा सविस्तर अहवाल सादर करण्याची सूचना त्‍यांनी मुकुंदवाडी पोलिसांना केली. गेल्या वर्षभरापासून आम्ही सातत्याने शाळांना सूचना करत आहेत. तरीही शाळा इतक्या बेजबाबदार कशा वागू शकतात, असा संताप पोलीस आयुक्‍तांनी व्यक्‍त केला. शाळेचा कुठलाही कर्मचारी किंवा विद्यार्थ्यांची वाहतूक करणाऱ्यांकडून विद्यार्थ्यांसोबत गैरकृत्य झाले आणि त्यात संबंधित व्यवस्थापनाने बेजबाबदारपणा केल्याचे समोर आले तर त्यांच्यावरही कठोर कारवाई करण्यात येईल, असा इशारा पोलीस आयुक्‍तांनी दिला.
विद्यार्थिनींची सुरक्षा : शिक्षण विभागाला आली जाग, बोलावली बैठक
दोन विद्यार्थिनींसोबत अश्लील कृत्‍याच्या घटना समोर आल्यानंतर शिक्षण विभागाला जाग आली आहे. शालेय शिक्षण विभागाने सर्व प्रकारच्या शाळा व्यवस्थापक, मुख्याध्यापकांची स्वतंत्र बैठक ११ ऑगस्टला संत एकनाथ रंगमंदिरात आयोजित केली आहे, अशी माहिती शिक्षणाधिकारी अश्विनी लाठकर व जयश्री चव्हाण यांनी दिली. शासनाने शालेय विद्यार्थ्यांच्या सुरक्षेसाठी अनेक उपाययोजना जाहीर केल्या आहेत. अनेक शाळांमध्ये या नियमांचे पालन केले जात नाही. पालन होते की नाही हे पाहण्याची तसदी शालेय शिक्षण विभाग घेत नाही. त्‍यामुळे शाळांचे फावते. मात्र दोन घटनांमुळे आता शालेय शिक्षण विभागात नियमांचे पालन करून घेण्यासाठी सरसावला आहे. बैठकीत विद्यार्थ्यांच्या सुरक्षेचा आढावा घेण्यात येणार असल्याचे माध्यमिकच्या शिक्षणाधिकारी अश्विनी लाठकर व प्राथमिकच्या शिक्षणाधिकारी जयश्री चव्हाण यांनी सांगितले. शाळांनी विद्यार्थ्यांच्या सुरक्षेबाबत काळजी घेतली नाही तर मान्यता रद्द करण्यात येऊ शकते, असा इशारा आता शालेय शिक्षण विभागाने दिला आहे.
.jpg)
.jpg)
.jpg)
.jpg)
.jpg)
.jpg)
.jpg)
.jpg)
