नारेगाव अतिक्रमण काढताना राडा करणाऱ्या ६ जणांविरुद्ध गुन्हा दाखल

छत्रपती संभाजीनगर (सीएससीएन वृत्तसेवा) : नारेगाव येथील मुख्य रस्‍त्‍यावरील अतिक्रमणांची पाडापाडी सुरू असताना दोन गटांत हाणामारी झाली. हाणामारी करणाऱ्यांची नावे पटवून सिडको एमआयडीसी पोलिसांनी मंगळवारी (५ जुलै) सहा जणांविरुद्ध गुन्हे दाखल केले आहे.

जुबेर कादर शहा (रा. नारेगाव), सुमेर अन्सारी (रा. एसआरएस मेडीकल, पाण्याच्या बंबाजवळ, नारेगाव रोड) व त्‍यांचे दोन दोन साथीदार अशा एकूण ६ जणांचा गुन्हा दाखल केलेल्यांत समावेश आहे. त्‍यांच्याविरुद्ध पोलीस अंमलदार विजय तेलुरे यांनी तक्रार दिली आहे. सोमवारी (४ ऑगस्ट) नारेगाव परिसरात महापालिकेतर्फे अतिक्रमण हटाव मोहीम सुरू होती. मोठा पोलीस बंदोबस्त तैनात करण्यात आला होता. दुपारी ४ ला कादर शहा यांचे नारेगाव मुख्य रस्त्यावरील घरासमोरील काही भागाचे अतिक्रमण काढले जात असताना जुबेर शहा कादर शहा हा महापालिकेच्या अधिकाऱ्यांशी चर्चा करत होता की, हे आमचे रहिवासी घर आहे.

आमच्या घरासमोरील भाग तोडू नका. त्यावेळी पोलिसांनी त्याला समजावून सांगून बाजूला केले. त्यावेळी सुमेर अन्सारी हा त्या घटनेचे मोबाइलवर व्हिडीओ शूटिंग करत होता. हे जुबेर शहा व त्याच्या साथीदारांनी पाहिले. त्यांनी सुमेरला तू हमारा व्हिडीओ शूट क्यू कर रहा है, असे म्हणून त्याच्यासोबत हुज्जत घालायला सुरुवात केली. सुमेर आणि सोबतचे दोन अनोळखी साथीदार हे जुबेर शहा व त्याच्यासोबत असलेल्यांसोबत वाद घालू लागले. त्‍यांची आपसात शिवीगाळ करून मारामारी सुरू झाली. त्यामुळे बंदोबस्तावर असलेल्या पोलिसांनी त्‍यांचे भांडण सोडवून त्‍यांना बाजूला केले. त्यावेळी सर्व पोलीस हे बंदोबस्तात व्यस्त असल्याने कारवाई केली नव्हती. अधिक तपास पोलीस अंमलदार अरविंद मेने करत आहेत.