अबब... देवगाव रंगारीत टोमॅटोला मिळाला ३०६ रुपये प्रती किलो उच्चांकी भाव!

By City News Desk

On 14 Aug 2025

अबब... देवगाव रंगारीत टोमॅटोला मिळाला ३०६ रुपये प्रती किलो उच्चांकी भाव!

कन्‍नड (सीएससीएन वृत्तसेवा) : देवगाव रंगारी येथील कृषी उत्पन्न उपबाजार समितीत टोमॅटो खरेदी-विक्री लिलावाला प्रारंभ झाला आहे. लिलावाच्या पहिल्याच दिवशी ५ हजार ६७८ कॅरेटची आवक झाली. सर्वप्रथम आलेले ताडपिंपळगाव (ता. कन्‍नड) येथील शेतकरी सादिक उस्मान शेख यांच्या शाहू वाणाच्या टोमॅटोला ३०६ रुपये प्रती किलो असा उच्चांकी भाव मिळाला.

व्यापारी थेट शेतात जाऊन टोमॅटो खरेदी करत असल्याने शेतकऱ्यांना अपेक्षित बाजारभाव मिळत नव्हता. त्‍यामुळे बाजार समितीने देवगाव रंगारी येथेच शेतमालाचा जाहीर लिलाव करण्याचा निर्णय घेतला. यंदा सोमवारपासून (११ ऑगस्ट) लिलावाला सुरुवात झाली. यामुळे चांगल्या गुणवत्तेच्या मालाला चांगला भाव मिळत आहे. सादिक शेख यांनी १८ कॅरेट (एका कॅरेटमध्ये २० किलो) टोमॅटोची विक्री केली. यातून त्यांना ८२ हजार ५३० रुपये मिळाल्याचे सांगण्यात आले.

देवगाव रंगारी येथील शेतकरी संतोष हिवाळे यांना २०१ रुपये प्रतिकिलो दर मिळाला. त्यांनी ११ कॅरेट टोमॅटो विकले. नंतर दिवसभर सरासरी ५४ रुपये किलोचा भाव मिळाला. टोमॅटोची दररोज सरासरी १९ हजार ६७ कॅरेटपर्यंत आवक होण्याची शक्यता आहे. शेतकऱ्यांनी आपला शेतमाल देवगाव रंगारी उपबाजार समितीत विक्रीसाठी आणावा, असे आवाहन सभापती डॉ. मनोज राठोड यांच्यासह संचालकांनी केले आहे.