SHOCKING : स्वातंत्र्यदिनाचा आनंद, शाळेत बिस्किटे वाटायचा प्लॅन, सायकलीने गावात निघालेल्या चिमुकल्याचा घातपात?; दूरपर्यंत रक्‍ताचे डाग अन्‌ विहिरीत आढळला मृतदेह, गंगापूर हादरले!

By City News Desk

On 15 Aug 2025

SHOCKING : स्वातंत्र्यदिनाचा आनंद, शाळेत बिस्किटे वाटायचा प्लॅन, सायकलीने गावात निघालेल्या चिमुकल्याचा घातपात?; दूरपर्यंत रक्‍ताचे डाग अन्‌ विहिरीत आढळला मृतदेह, गंगापूर हादरले!

गंगापूर (सीएससीएन वृत्तसेवा) : गंगापूर तालुक्यातील मुद्देशवाडगाव शिवारात गुरुवारी (१४ ऑगस्ट) रात्री नऊच्या सुमारास सिद्धार्थ विजय चव्हाण (वय १२, रा. मुद्देशवाडगाव) या चिमुकल्याचा मृतदेह संशयास्पदरित्या विहिरीत आढळल्याने खळबळ उडाली आहे. शुक्रवारी स्वातंत्र्यदिन असल्याने शाळेत वाटण्यासाठी तो गावात बिस्कीट आणायला गेला होता.

शेतकरी विजय चव्हाण हकिगतपूर येथील वस्तीशाळेजवळ कुटुंबासह राहतात. त्यांचा मुलगा सिद्धार्थ गावातील जिल्हा परिषद शाळेत सहावीत शिकतो. गुरुवारी नेहमीप्रमाणे शाळेतून घरी आल्यानंतर सिद्धार्थ दुपारी साडेतीनला सायकलवर गावात बिस्किट आणण्यासाठी गेला. त्यानंतर तो घरी परतला नाही. सायंकाळ झाली तरी सिद्धार्थ घरी न आल्याने कुटुंबीयांनी शोध सुरू केला. सायकल रस्त्यावर आढळली. काही अंतरावर रक्‍ताचे डाग आढळले.

या डागांचा माग काढला असता ते भारत दारुंटे यांच्या विहिरीपर्यंत गेले. गंगापूर पोलिसांनी घटनास्थळी श्वान व फॉरेन्सिक पथकाला पाचारण केले. रात्री नऊला विहिरीत गळ टाकून शोध घेतला असता सिद्धार्थ गळात अडकून आला. त्‍याला तातडीने गंगापूरच्या उपजिल्हा रुग्णालयात आणले असता डॉक्टरांनी तपासून मृत घोषित केले. सिद्धार्थच्या मृत्‍यूबद्दल शंका-कुशंका व्यक्‍त करण्यात येत असून, मृतदेहाच्या उत्तरीय तपासणी अहवालानंतरच खरे कारण समोर येर आहे. त्याच्या पश्चात आई-वडील, एक भाऊ, दोन बहिणी असा परिवार आहे.