छ. संभाजीनगरातील लुटारू शाळांवर खरंच कारवाई होणार?; शिक्षणाधिकाऱ्यांच्या इशाऱ्याला शाळा किती गांभीर्याने घेणार?

छत्रपती संभाजीनगर (सीएससीएन वृत्तसेवा) : खासगी शाळांकडून विद्यार्थ्यांच्या पालकांची सर्रास लूट होत असते. शिक्षण विभागातील अधिकाऱ्यांचे हितसंबंध गुंतलेले असल्याने अशा शाळांवर कारवाईसुद्धा होत नसल्याचे दुर्दैवी चित्र आहे. कुणी तक्रार केलीच तर कारवाईचा इशारा देऊन वेळ मारून नेली जाते. वेगवेगळी कारणे पुढे करून विद्यार्थ्यांकडून अवैध शुल्क वसुली सध्या छत्रपती संभाजीनगरातील खासगी शाळा करत आहेत. याकडे रिपब्‍लिकन सेनेचे मराठवाडा अध्यक्ष सचिन निकम यांनी शिक्षण विभागाचे लक्ष वेधले आहे.

अनुदानित प्राथमिक व माध्यमिक शाळांत अवैध शुल्क वसूल केल्याच्या तक्रारी शिक्षण विभागाकडे आल्या असून, अशा शाळांची पडताळणी करून दोषी शाळांवर कारवाईचा इशारा माध्यमिक शिक्षण विभागाने दिला आहे. हा इशारा तोंडदेखला न ठरता प्रत्‍यक्षात अशा शाळांवर कारवाई केली तरच लुटारू शाळांना लगाम बसेल, अशी अपेक्षा पालक व्यक्‍त करत आहेत. बिल्डिंग फंड, विकास निधी, प्रवेश शुल्क, परीक्षा शुल्काच्या नावाखाली शाळांकडून लूट होत असते.

६ ते १४ वयोगटातील विद्यार्थ्यांना मोफत शिक्षण देणे सरकारने बंधनकारक केले आहे. शाळांनी वयानुरूप प्रवेश द्यावा, शाळा सोडण्याचा दाखला द्यावा व कोणत्याही विद्यार्थ्याला शिक्षणापासून वंचित करू नये, असे स्पष्ट आदेश आहेत. मात्र शिक्षण विभागातील अधिकाऱ्यांच्या बोटचेप्या भूमिकेमुळे शहरातील खासगी शाळा मनमानी करत आहेत. आता शिक्षण विभागाने शाळांवर तपासणी पथक पाठवण्याची तयारी केल्याचे सांगण्यात येत आहे. सर्व अनुदानित शाळांनी दर्शनी भागात कोणतेही अतिरिक्त शुल्क आकारले जात नाही, असा फलक लावण्याचे आदेश माध्यमिक शिक्षणाधिकारी अश्विनी लाठकर यांनी दिले आहेत. आता असे फलक खरंच शाळा लावणार का आणि फलक न लावणाऱ्या आणि फलक लावूनही लूट करणाऱ्या शाळांवर शिक्षण विभाग कारवाई करणार का, याकडे पालकांचे लक्ष लागले आहे.