वैजापूरचा लाचखोर कृषी सहायक जगदीश गवळी ACB च्या जाळ्यात!

By City News Desk

On 24 Jul 2025

वैजापूरचा लाचखोर कृषी सहायक जगदीश गवळी ACB च्या जाळ्यात!

वैजापूर (सीएससीएन वृत्तसेवा) : वैजापूर येथील लाचखोर कृषी सहायक जगदीश गेणुदास गवळी (वय ४१, रा. विनायक कॉलनी, वैजापूर) हा लाचलुचपत प्रतिबंधक विभागाच्या जाळ्यात बुधवारी (२३ जुलै) दुपारी दोनला अडकला. त्‍याला वैजापूर शहरातीलच एका हॉटेलमध्ये शेतकऱ्याकडून ५ हजार रुपये घेताना रंगेहात पकडण्यात आले.

तक्रारदार शेतकऱ्याची नारळा (ता. वैजापूर) शिवारात शेती आहे. त्‍यांना शेततळे मंजूर झाले होते. शेततळ्याचे एकूण २ लाख २५ हजार रुपये मंजूर होण्यासाठी आवश्यक प्रस्ताव वरिष्ठ कार्यालयात पाठविण्यासाठी जगदीश गवळी पैसे मागत होता. शेतकऱ्याने त्‍याला ३० हजार रुपये दिलेही होते. मात्र पैशांची हाव सुटलेल्या गवळीने आणखी पैशाची मागणी केली.

त्‍यामुळे शेतकऱ्याने छत्रपती संभाजीनगर येथील लाचलुचपत प्रतिबंधक विभागाच्या अधिकाऱ्यांशी संपर्क साधला. पोलीस निरीक्षक धनराज बांगर, वाल्मिक कोरे, पोलीस अंमलदार राजेंद्र जोशी, युवराज हिवाळे, सी. एन. बागुल यांच्या पथकाने गवळीसाठी सापळा रचला. शहरातील एका हॉटेलमध्ये पाच हजार रुपये शेतकऱ्याकडून घेताना त्‍याला रंगेहात पकडण्यात आले. त्‍याच्याविरूद्ध वैजापूर पोलीस ठाण्यात गुन्हा दाखल करण्यात आला आहे. या कारवाईमुळे कृषी विभागातील लाचखोरांमध्ये खळबळ उडाली आहे.