छत्रपती संभाजीनगर (सीएससीएन वृत्तसेवा) : रस्‍त्‍याने एकट्याने जाणाऱ्यांना चाकूचा धाक दाखवून लुटायचे. सिडको एमआयडीसी, जवाहरनगर पोलीस ठाण्यात अनेकांना लुटल्यानंतर काल्डा कॉर्नरजवळील घटनेने त्‍यांचे दिवस भरवले. जवाहरनगर पोलिसांनी जंगजंग पछाडत ३ लुटारूंच्या मुसक्या आवळल्या आहेत. त्‍यांचा एक साथीदार फरारी असून, त्‍याच्या मागावर पोलीस आहेत.
सौरभ बबन मगरे (वय २०, रा. अंबिकानगर, गल्ली नं. १३, मुकुंदवाडी), धनंजय बालासाहेब जोगदंड (वय २२, रा. साईनगर गारखेडा परिसर) आणि एक १६ वर्षांचा विधीसंघर्ष बालक (रा. अंबिकानगर) अशी अटक केलेल्यांची नावे आहेत. सोमवारी (२१ जुलै) रात्री ९ ते मंगळवारी (२२ जुलै) च्या पहाटे दोनच्या दरम्‍यान (मध्यरात्री) चार लुटारू दुचाकीवरून सुसाट जात रस्‍त्‍याने एकटे जाणाऱ्या लोकांना चाकूचा धाक दाखवून लुटत होते. ते सिडको एमआयडी, चिकलठाणा, झाल्टा गाव, बीड बायपासने दर्गा चौक, रोपळेकर चौकमार्गे काल्डा कॉर्नरकडे निघाले होते. फोटोग्राफर योगेश अनिल गुडीवाल (वय २६, रा. हनुमाननगर, गल्ली नं. १) हे त्‍याचवेळी मोटारसायकलीने घरी येत असताना काल्डा कॉर्नरजवळील एच.पी. पेट्रोलपंपासमोरील मोकळ्या जागेत लघुशंकेसाठी थांबले.
मागून मोटारसायकलवरील चार लुटारू आले. त्‍यांनी योगेश यांना मागून पकडले. एकाने गळ्याला चाकू लावून धाक बळजबरीने खिशातून पैसे व मोबाइल काढून घेतला. योगेश यांची दुचाकी घेऊन पळून गेले. योगेश यांच्या तक्रारीवरून जवाहरनगर पोलिसांनी चौघांविरुद्ध गुन्हा दाखल करून तपास सुरू केला. घटनेचे गांभीर्य लक्षात घेता पोलीस निरीक्षक सचिन कुंभार यांनी तत्काळ पोलीस ठाणे हद्दीत गस्त वाढवली. लुटारूंचा शोध घेण्यासाठी पोलीस अंमलदार शोन पवार, संदीप क्षीरसागर, वामन नागरे, महिला पोलीस अंमलदार अलका रोकडे, पोलीस अंमलदार मारोती गोरे यांचे पथक नेमले.
सिनेस्‍टाइल पाठलाग करून पकडलेपथक लुटारूंचा शोध घेत घेत मंगळवारी रात्री साडेअकराच्या सुमारास पायलट बाबानगरी विमानतळाच्या भींतीसमोरील मोकळ्या मैदानात पोहोचले. तिथे लुटारूंपैकी दोघे मिळून आले. त्‍यात एक सौरभ मगरे व दुसरा विधीसंघर्ष बालक होता. पोलिसांना पाहून ते पळत असताना पोलिसांनी पाठलाग करून त्यांना ताब्यात घेतले. त्‍यांनी गुन्ह्याची कबुली दिली. त्‍यांच्या ताब्‍यातून गुन्ह्यातील दुचाकी, मोबाइल, चाकू जप्त केला. त्यांना न्यायालयात हजर केले असता न्यायालयाने ३ दिवसांची पोलीस कोठडी सुनावली. आज, २५ जुलैला दोन फरारी लुटारूंपैकी धनंजय जोगदंडला अटक करण्यात यश आले. त्‍याला न्यायालयात हजर केले असता ४ दिवसांची पोलीस कोठडी सुनावली.
दीड लाखाचा मुद्देमाल जप्त
आणखी एक लुटारूचा शोध सुरू आहे. या लुटारूंनी यापूर्वी गळ्याला चाकू लावून अनेकांची लूट केल्याची कबुली दिली. त्‍यात सिडको एमआयडीसी, जवाहरनगर पोलीस ठाण्याच्या हद्दीत त्‍यांनी गुन्हे केल्याचे समोर आले. त्‍यांच्याकडून एकूण १ लाख ५० हजार ३०० रुपयांचा मुद्देमाल जप्त करण्यात आला. ही कारवाई पोलीस आयुक्त प्रवीण पवार, पोलीस उपायुक्त प्रशांत स्वामी, सहायक पोलीस आयुक्त रणजीत पाटील, पोलीस निरीक्षक सचिन कुंभार यांच्या मार्गदर्शनाखाली तपास अधिकारी सहायक पोलीस निरीक्षक श्री. लोहकरे, पोलीस अंमलदार शोन पवार, संदीप क्षीरसागर, वामन नागरे, महिला पोलीस अंमलदार अल्का रोकडे, पोलीस अंमलदार मारोती गोरे यांनी पार पाडली.
.jpg)
