आधी लग्‍नाची मागणी, नकार मिळताच १५ वर्षीय मुलीला मध्यरात्री घरातून पळवून नेले!; २५ वर्षीय तरुणाचे कृत्‍य, पैठणची घटना

By City News Desk

On 25 Jul 2025

आधी लग्‍नाची मागणी, नकार मिळताच १५ वर्षीय मुलीला मध्यरात्री घरातून पळवून नेले!; २५ वर्षीय तरुणाचे कृत्‍य, पैठणची घटना

बिडकीन, ता. पैठण (सीएससीएन वृत्तसेवा) : आधी लग्‍नाची मागणी घातली. मात्र मुलगी अल्पवयीन असल्याने तिच्या आई-वडिलांनी नकार दिला. त्‍यानंतर तरुणाने मुलीला मध्यरात्री घरातून पळवून नेले. ही घटना पैठण तालुक्‍यातील लोहगावमध्ये समोर आला आहे. बिडकीन पोलिसांनी मुलीच्या आईच्या तक्रारीवरून तरुणाविरुद्ध गुन्हा दाखल केला आहे.

संदीप लक्ष्मण मोरे (वय २५, रा. लोहगाव, ता. पैठण) असे तरुणाचे नाव आहे. तो त्‍याच्या मावशीकडे ४ वर्षांपासून राहतो. मुलगीही त्‍याच्या घराच्या काही अंतरावर कुटुंबासह राहते. गेल्या वर्षी संदीपच्या मावशीने मुलीच्या घरच्यांना मुलीचे लग्‍न संदीपसोबत लावून द्या, अशी मागणी केली होती. मात्र तिचे वय कमी असल्याने मुलीच्या घरच्यांनी नकार दिला. १८ जुलैला रात्री ११ ला मुलगी आईजवळच झोपली होती.

मध्यरात्री साडेबारानंतर आईला जाग आली असता मुलगी जागेवर दिसली नाही. त्‍यांनी घरात, आजूबाजूला तिचा शोध घेतला. मात्र ती मिळून आली नाही. त्‍यामुळे त्‍यांनी लगेचच पतीला सांगितले. मुलीचे वडील, मामा यांनी गावात व परिसरात शोध घेतला. संदीपही घरी नसल्याचे त्‍यांना कळले. संदीप मावशीने तो कुठे गेला, हे माहीत नसल्याचे सांगितले. त्‍यानंतर मुलीच्या आईने बिडकीन पोलीस ठाणे गाठून संदीपविरुद्ध तक्रार दिली आहे. त्‍यावरून पोलिसांनी अपहरणाचा गुन्हा दाखल करून दोघांचा शोध सुरू केला आहे.