छत्रपती संभाजीनगर (सीएससीएन वृत्तसेवा) : खतरनाक गुन्हेगार सौरभ अनिल भोले (वय २४, रा. समतानगर, क्रांती चौक) हा मंत्री संजय शिरसाटांच्या बंगल्यात शिरला, पोलिसांशी हमरीतुमरी केली... इथंपर्यंत ठीक आहे. पण त्‍यापुढचे दावे फोल ठरले आहेत. त्‍याच्या दुचाकीत चाकू आढळल्याने त्‍याच्यापासून मंत्री शिरसाटांना धोका होता, तो निघताना मोठे काम मिळाल्याचे मित्रांना म्‍हणाला, तो ताफ्यात शिरला, त्‍याचवेळी काही मिनिटांसाठी लाइट गेली, या अंधारात तो काहीतरी करणार होता... हे सगळं सगळं, आता जवळपास मनाच्या कहाण्या असल्याचे समोर येत आहे. थोडक्‍यात काय तर आता पोलिसांच्या म्‍हणण्यानुसार, तो दारूच्या नशेत मंत्री शिरसाटांच्या ताफ्यात शिरला. त्याला वाटले पुढे रस्ताच आहे!
सौरभ भोलेविरुद्ध खून आणि हाणामारीचे गंभीर गुन्हे दाखल आहेत. त्‍याने रविवारी (२० जुलै) रात्री ११ ला पोलिसांची सुरक्षा भेदून मंत्री शिरसाट यांच्या बंगल्यात घुसण्याचा प्रयत्न केला. मात्र, हा प्रकार त्‍याने केवळ दारूच्या नशेत केल्याच्या निष्कर्षाप्रत पोलीस आले आहे. त्यामुळे गुरुवारी (२४ जुलै) न्यायालयाने त्याची न्यायालयीन कोठडीत रवानगी केली. त्‍याच्याकडे विनाक्रमांकाची दुचाकी व दुचाकीच्या टूलबॉक्समध्ये धारदार चाकू आढळल्याने हे प्रकरण गंभीर झाले होते. मंत्री शिरसाटांनी त्याला कुणीतरी पाठवल्याची शक्‍यता व्यक्‍त केल्याने यंत्रणाही अलर्ट मोडवर आली होती.
असा घडला प्रकार...३०-३० घोटाळ्यातील आरोपी पंकज जाधव नुकताच जामिनावर सुटला आहे. पंकजसोबत सौरभची हर्सूल जेलमध्ये ओळख झाली होती. पंकज आणि सौरभव आणि त्‍यांचे आणखी दोन मित्र यांनी सोबत दारूची पार्टी केली. नंतर ते थापटी तांडा (ता. पैठण) येथील कुलस्वामिनी कला केंद्रात गेले. तिथे ललनांवर पैसे उधळले. नंतर शिरसाट यांच्या बंगल्यामागे राहणाऱ्या पंकजच्या सोसायटीबाहेर रात्री १० ला सौरभ कारमधून उतरला. तिथे उभी केलेली दुचाकी घेऊन पडेगावच्या दिशेने निघाला. मात्र नशेत त्याला रस्ताच कळला नाही. शिरसाट यांचा ताफा निघाल्यानंतर त्याला पुढे रस्ताच असल्याचे वाटल्याने तो थेट ताफ्यात घुसला...
शिरसाट यांच्या ताफ्यात पोलिसांची जवळपास ४ वाहने व १२ पोलीस असतात. घराच्या सुरक्षेसाठी ४ पोलीस अंमलदार तैनात असतात. २ फेब्रुवारी २०२५ रोजी क्रांतीनगरात कल्पेश विजय रुपेकरची वैभव मालोदे, वैभव गिरी, प्रेम तीनगोटे व सौरभ भोलेने क्रूर हत्या केली होती. त्यात सौरभला अटक झाली होती. जूनमध्ये तो जामिनावर जेलमधून बाहेर आला होता. घटनेपूर्वी मित्रांना आज बडा काम मिला है, बहोत पैसे मिलेंगे, असे त्‍याने सांगितले होते. त्यामुळे त्याला कोणी सुपारी दिलीये का या दिशेनेही पोलिसांनी तपास केला. सौरभ बंगल्यात शिरण्याचा प्रयत्न करत असतानाच नेमका त्‍याचवेळी बंगल्याचा वीजपुरवठा खंडित झाला होता. जनरेटर सुरू झाल्यानंतर सीसीटीव्ही कॅमेरे सुरू व्हायला वेळ लागतो. त्यामुळे हा सुनियोजित कट असू शकतो, अशी शंका निर्माण झाली.
.jpg)
